Qońırat rayonında puqaralardıń turmıs sharayatın jaqsılaw hám dáramat alıwına kómeklesiw boyınsha jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonındaǵı «Qońırat» APJ aymaǵında jasawshı qıytaq jer iyesi Orazbaev Turǵanbay, óz brendine iye «SarbiRamazan» biogumus islep shıǵarıw firması iyesi «Sanaat» mákan puqaralar jıyını turǵını Dáwletiyarov Bayrambay sonday-aq, pal hárreshilik penen shuǵıllanıp atırǵan Djumaniyazov Mansurdıń jumısları menen tanıstı.
Qıytaq jerlerindegi ónim alıw boyınsha shólkemlestirilgen jumıslar kózden ótkerilip, az ǵana jerdi joqarı dáramat deregine aylandırıwǵa qaratılǵan búnday tájiriybeler kópshilikke úlgi bolıwı kerek ekenligi atap ótildi.

«Hár bir shańaraq isbilermen» baǵdarlaması sheńberinde jeńilletilgen kredit alıp, óz úyinde mebel islep shıǵarıwdı jolǵa qoyǵan Begzad Ashirovtıń jumısları barıp kórildi. Isbilermenligin keńeytiw boyınsha usınıslar berilip, isbilermenler barqulla qollap-quwatlanatuǵınlıǵı atap ótildi.





«Kiyet» APJ aymaǵında «O‘zsanoatqurilishbank» tarepinen «Bir kontur bir ónim» ólshemi tiykarında 15 gektar jer maydanında ámelge asırılıp atırǵan joybar kórip shıǵıldı. Biriktirilgen puqaralardıń qosımsha dáramat alıwına kómeklesiw boyınsha bul baslama tolıq ámelge asırıwda barlıq ilajlardı kóriw boyınsha tapsırmalar berildi. 


Joqarǵı Keńes Baslıǵı «Almazar» MPJ aymaǵındaǵı sociallıq úy turǵınları menen de ushırastı. Olardıń mashqalaların tıńlap, juwapkerlerge kóterilgen máselelerge tez pursatta unamlı sheshim tabıw boyınsha anıq tapsırmalar berildi.