Qońırat rayonın sociallıq-ekonomikalıq jaqtan rawajlandırıw máseleleri keń túrde talqılandı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikalıq hám rayonlıq mákeme-shólkemler juwapkerleri qatnasıwında Qońırat rayonın rawajlandırıw máselelerine arnalǵan májilis ótkerdi.
Onda dáslep, húrmetli Prezidentimizdiń PQ-132-sanlı qararı menen Qońırat rayonın 2025-2026-jıllarda jedel kompleksli rawajlandırıw baǵdarlaması sheńberinde ámelge asırılıwı tiyis wazıypalar keń túrde sóz etildi.
Bunnan soń rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hámde investiciyalıq joybarlardı ámelge asırıw baǵdarındaǵı ámelge asırılıp atırǵan jumıslar, xalıqtıń múnásip turmıs sharayatın támiyinlew, jańa jumıs orınların jaratıw, abadanlastırıw jumısların alıp barıw sıyaqlı belgilengen wazıypalardıń orınlanıwı máseleleri kórip shıǵıldı. 
Atap ótiw orınlı, rayondı hár tárepleme rawajlandırıw boyınsha arnawlı baǵdarlama tiykarında bir qatar wazıypalar belgilep berilgen. Bunıń ushın qarjılıq derekleri hám imkaniyatlar da jaratılǵan.
Biraq, ayırım orınlarda mákeme-shólkem basshıları hám juwapkerler, sonday-aq, máhálle belsendileri tárepinen kemshiliklerge jol qoyılmaqta.
Atap aytqanda, máhállelerdegi jumıslardıń ámelde orınlanıwı, berilgen esabatlarda qosıp jazıwlarǵa jol qoyılǵanlıǵı, abadanlastırıw, pukaralardıń bántligin támiyinlew baǵdarında ilajlardıń talap dárejesinde emesligi sınǵa alındı. Juwapkerler eskertilip, ayırımlarına intizamiy jaza sharasın qollaw boyınsha tapsırmalar berildi.