Qaraqalpaqstan delegaciyası ámeliy sapar menen Birlesken Arab Ámirliklerine bardı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı Qaraqalpaqstan delegaciyası Prezidentimizdiń tapsırması menen Birlesken Arab Ámirliklerine bardı.
Sapar sheńberinde dáslep «2 Point Zero» kompaniyası atqarıwshı direktorı Maryam AlMxeiri menen ushırasıw ótkerildi.
Ushırasıwda dáslep húrmetli Prezidentimiz hám Birlesken Arab Ámirlikleri basshıları tárepinen jolǵa qoyılǵan hám barǵan sayın bekkemlenip baratırǵan doslıq hám jaqın sheriklik baylanısları haqqında keń túrde atap ótildi.
Sonday-aq, Qaraqalpaqstannıń investiciyalıq potencialı, ekonomikalıq kórsetkishleri, perspektivalı xalıqaralıq joybarlardı ámelge asırıw boyınsha jaratılǵan sharayatlar haqqında toqtalıp ótildi.
Onda kompaniyanıń finanslıq xızmetler, jasalma intellekt texnologiyaları, áhmiyetli resurslar, sanlı transformaciya hám basqa da jónelislerdegi tájiriybeler haqqında atap ótilip, birge islesiwdi jolǵa qoyıw boyınsha usınıslar bildirildi.
Sonday-aq, Qaraqalpaqstandaǵı bar bolǵan kánlerde birgelikte geologiyalıq-izlew jumısların alıp barıw hám ekologiyalıq qáwipsiz ózlestiriw, eki mámleket universitetleri hám ilimiy mákemeleri menen birgelikte qospa izertlew orayları hám kadrlar tayarlaw baǵdarlamaların shólkemlestiriw, respublikamızdıń turizm tarawında ele ashılmaǵan imkaniyatlardan paydalanıw máseleleri talqılandı.
Bunnan soń «Burjeel holdings» hám «Life Pharma» kompaniyaları wákilleri menen ushırasıw ótkerildi.
Jetekshi integraciyalasqan mámleketlik emes medicinalıq xızmet kórsetiwshi kompaniyalardan biri bolǵan «Burjeel holdings» wákilleri menen sóylesiwlerde medicinalıq járdem tarawında qánigelerdi tayarlaw, diagnostika, profilaktika, densawlıqtı saqlaw tarawın sanlastırıw, jergilikli shıpakerlerdiń bilim-kónlikpelerin arttırıw boyınsha tájiriybe almasıwdı jolǵa qoyıw máseleleri talqılandı.
Bunnan tısqarı, Qaraqalpaqstandaǵı hayallar arasında kókirek bezi ragı keselligin erte basqıshta anıqlaw maqsetinde mobil mammografiya úskeneleri jetkerip beriw hám joqarı tájiriybege iye qánigeler menen támiyinlew boyınsha kelisip alındı.
Atap ótiw orınlı, Nókis qalasında Birlesken Arab Ámirlikleriniń «Xalifa Bin Zayed Al Nahayan» fondı tárepinen 28 million dollar donorlıq qarjıları tiykarında «Ana hám bala» klinikası qurılıp atırǵan bolıp, sóylesiwlerde bul klinika paydalanıwǵa tapsırılǵannan soń, «Burjeel holdings» kompaniyası basqarıwına alıw boyınsha kelisimlerge erisildi.
«Life Pharma» kompaniyası wákilleri menen farmacevtika tarawın rawajlandırıw, Qaraqalpaqstanda ósetuǵın, xalıqaralıq dárejede joqarı esportqa iye dárilik ósimliklerdiń biri bolǵan boyan tamırdı qayta islew boyınsha birgelikte joybarlardı ámelge asırıw sıyaqlı áhmiyetli máseleler kórip shıǵıldı. Ushırasıw juwmaǵında eki tárepleme birge islesiwdi jolǵa qoyıw boyınsha kelisip alındı.
Ótkerilgen ushırasıwlarda bir qatar paydalı kelisimlerge erisildi, áhmiyetli shártnamalarǵa qol qoyıldı. Birge islesiw boyınsha perspektivalı joybarlar keń túrde dodalandı. Birlesken Arab Ámirliklerine bolǵan ámeliy sapar dawam etedi.
