Joqarǵı Keńes Baslıǵınıń respublikamızdıń arqa rayonlarındaǵı isbilermenler ushın kóshpeli qabıllawı bolıp ótti

Búgin Shımbay rayonı hákimliginde Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń Taxtakópir, Qaraózek, Bozataw, Kegeyli hám Shımbay rayonındaǵı isbilermenlerdi qıynap kiyatırǵan mashqalalar hám usınısları boyınsha kóshpeli qabıllawı bolıp ótti.

Dáslep, Joqarǵı Keńes Baslıǵı búgingi kúnde húrmetli Prezidentimiz tárepinen Qaraqalpaqstanda isbilermenlikti rawajlandırıw hám qollap-quwatlaw, investiciyalıq tartımlılıqtı arttırıw boyınsha ayrıqsha qabıl etilgen párman hám qararları tiykarında jaratılǵan imkaniyatlar boyınsha keń túrde atap ótti.

Bunnan soń isbilermenlerdiń múrájatları tıńlanıp, ornında sheshimin tabıw ilajları kórildi. 

Qabıllawda tiykarınan isbilermenlikti rawajlandırıw baǵdarında ushırasıp atırǵan mashqalalar, qarjılandırıw hám kredit ajıratıw máseleleri, kadastr hújjetlerin rásmiylestiriw, jer orınların ajıratıw, islep shıǵarıw, óndiristi keńeytiw baǵdarında múrájatlar bildirildi.


Bildirilgen múrájatlardıń basım kópshiligine ornında sheshimin tabıw ilajları kórildi. Bunnan tısqarı, waqıt talap etiletuǵın múrájatlar Joqarǵı Keńes Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi.