Joqarǵı Keńes Baslıǵı Taxtakópir rayonındaǵı jańa joybarlar hám puqaralardıń qosımsha dáramat alıwına kómeklesiw jumısların barıp kórdi

Dáslep, Joqarǵı Keńes Baslıǵı «Qaraoy» APJ aymaǵında jaylasqan «KAUSAR TEGIRMON» JShJ kárxanasınıń Sharwashılıq joybarı boyınsha ámelge asırǵan jumısı menen tanıstı. Atap ótiw orınlı, 2025-jıl dawamında kárxana tárepinen ulıwma bahası 32,0 mlrd.sumlıq sharwashılıqtı rawajlandırıw hám sútti qayta islew joybarların ámelge asırıw belgilengen. Búgingi kúnde sharwashılıq kompleksine 120 bas násilli qaramallar alıp kelinip kútimli baǵılmaqta. 

Bunnan keyin «KAUSAR TEGIRMON» JShJniń bahası 878,0 mıń dollarlıq «Júndi qayta islew» joybarı sheńberinde jolǵa qoyılǵan óndiris processleri, texnologiyalıq úskeneler hám ónim tayarlaw basqıshları kózden ótkerildi. 

Bunnan soń, Joqarǵı Keńes Baslıǵı usı aymaqta jaylasqan, Germaniyaǵa eksportın ámelge asırıp atırǵan «Good Salt production» JShJ tárepinen shólkemlestirilgen «As duzın islep shıǵarıw» kárxanasında bolıp, usı joybardıń ámelge asırılıwı, óndiris quwatlıqları hám jaratılǵan jumıs orınları menen jaqınnan tanıstı.

Joqarǵı Keńes Baslıǵı «Taxtakópir» PPJ aymaǵında shólkemlestirilgen kishi sanaat zonasında bolıp, usı aymaqta jumıs alıp barıp atırǵan «From Mebel» jeke menshik kárxanası tárepinen shólkemlestirilgen «Mebel islep shıǵarıw» cexınıń jumısı menen jaqınnan tanıstı.

Bunnan soń, Joqarǵı Keńes Baslıǵı rayondaǵı “Dáwqara” APJ aymaǵında «Taxtakopir Gold Tekstil Mahsulotlari» JShJ tárepinen shólkemlestirilip atırǵan  toqımashılıq joybarı menen jaqınnan tanıstı.

Prezidentimizdiń 129-sanlı pármanına tiykar bul investiciyalıq joybar ushın 4,5 gektar jer maydanı ajıratıldı. Ulıwma bahası 25,4 mln AQSh dolları bolǵan joybarǵa muwapıq jılına 5 mıń tonna jip iyirip shıǵarılıp, jılına 11,1 mlrd. sum muǵdarında tayar ónim islep shıǵarıw rejelestirilgen. Tolıq iske túsiwi nátiyjesinde 257 jańa jumıs orınları jaratıladı.

Rayonǵa sapar dawamında Joqarǵı Keńes Baslıǵı rayondaǵı «Ózbekstan» MPJ aymaǵında jasawshı N.Fayzullaev, N.Ametov, Ó.Temirbekov hám «Aydın jol» MPJ da jasawshı M.Dawletyarovlardıń shańaraǵında bolıp, qıytaq jer iyeleri menen jaqınnan sáwbette boldı. Olardıń azǵana jerden mol dáramat alıp atırǵanı joqarı bahalandı.

Toǵay xojalıǵı jer maydanları da kózden ótkerildi. Gúzgi terek egiwge jerlerdi hám nállerdi tayarlaw, jumıslardı shólkemleskenlik penen alıp barıw boyınsha juwapkerlerge tapsırmalar berildi.

Rayondaǵı «A.Adilov» APJ aymaǵındaǵı «Toranǵıl-say» hám «Atakól» APJ aymaǵında jaslasqan «Tayımbet» fermer xojalıqlarındaǵı jumıslar da kózden ótkerildi. Awıl xojalıǵı tarawında suwdıń artıqsha jumsalıwınıń aldın alıw, zúráátlilikti arttırıw hám zamanagóy texnologiyalardı keńnen engiziw boyınsha bul jumıslar sistemalı túrde dawam ettiriliwi kerek ekenligi atap ótildi.