Joqarǵı Keńes Baslıǵı basshılıǵında Taxtakópir rayonın rawajlandırıw máseleleri talqılandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taxtakópir rayonınıń sociallıq-ekonomikalıq rawajlanıwı máselelerine arnalǵan májilis ótkerdi.


Onda dáslep ámelge asırılıp atırǵan jumıslar boyınsha úyreniwler nátiyjeleri, rayondaǵı investiciyalıq joybarlar, ózin-ózi bánt etken puqaralardıń shańaraqlarında ámelge asırılıp atırǵan jumıslar kórip shıǵıldı. Sonday-aq, abadanlastırıw jumısları hám ekonomikalıq kórsetkishler tereń talqılanıp, jollardı ońlaw, sociallıq obektlerdi qurıw hám rekonstrukciyalaw jumısları boyınsha bar bolǵan mashqalalar hám olardı sheshiw máseleleri talqılandı. 

Máhállelerde puqaralardıń qosımsha dáramat alıwına kómeklesiw, úy sharayatında ózin-ózi bánt etiwine jaqınnan járdem beriw, kishi isbilermenlik subektleri jumısların jolǵa qoyıw,jeńilletilgen kredit qarjıların ajıratıw sıyaqlı áhmiyetli jumıslar sın kóz-qarastan kórip shıǵıldı.

Májilis dawamında Joqarǵı Keńes baslıǵı tárepinen atap ɵtilgen kemshiliklerdi saplastırıw boyınsha tiyisli shólkem hám juwapkerlerge anıq wazıypalar belgilep alındı. 

Májiliste óz wazıypasın orınlawda qáte-kemshiliklerge jol qoyǵanı ushın Taxtakópir rayonı hákiminiń finans-ekonomika hám kámbaǵallıqtı qısqartıw máseleleri boyınsha birinshi orınbasarı-ekonomikalıq rawajlanıw hám kámbaǵallıqtı qısqartıw bólimi baslıǵı iyelep turǵan lawazımınan bosatıldı. Sonday-aq, ayırım basshılar hám juwapkerlerge intizamiy jaza sharasın qollaw, óz wazıypasına nemquraylıq penen qaraǵanlardıń lawazımına ılayıqlıǵı máselesin kórip shıǵıw boyınsha tapsırmalar berildi.