Belbewli gúres boyınsha Jáhán hám Aziya chempionatı bellesiwleriniń ashılıw saltanatı ótkerildi

Búgin Nókis qalasındaǵı 1-sanlı sport mektebinde (Manej) sporttıń Belbewli gúres túrinen Ózbekstan Respublikası Prezidenti sıylıǵı ushın jas óspirim er balalar hám qızlar arasında Jáhán hám Aziya chempionatı bellesiwleriniń ashılıw saltanatı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq qatnasıwshılardı jarıstıń ashılıwı múnásibeti menen qutlıqladı hám áwmet tiledi.

Bunnan soń kún dawamında ótkeriliwi belgilengen sport jarısları baslap jiberildi.

Atap ótilgenindey, sońǵı jılları elimizde húrmetli Prezidentimizdiń basshılıǵında dene tárbiya hám sporttı rawajlandırıwǵa, jaslardı sportqa keńnen qamtıp alıwǵa, Olimpiya sport túrleri menen bir qatarda milliy sport túrlerin de rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atır.

Álbette, usınday jarıslardıń ótkeriliwi elimizde belbewli gúres sport túrin jáne de ǵalabalastırıwda hám xalıqaralıq bellesiwler jeńimpazların jetilistirip shıǵarıwda áhmiyetli orın iyeleydi.

Ótkerilgen ilaj dawamında óz salmaq kategoriyası boyınsha jeńimpazlar qatarınan orın alǵan bir qatar jaslarǵa medal hám bahalı sawǵalar tapsırıldı.