Joqarǵı Keńes Baslıǵı «Imkon» shólkemindegi balalardı bayram múnásibeti menen qutlıqladı

«1-iyun – Xalıqaralıq balalardı qorǵaw kúni» bayramı respublikamız boyınsha orınlarda keń túrde belgilenbekte. 

Búgin Nókis qalasındaǵı «Imkon» reabilitaciya orayına iye mámleketlik kóp tarmaqlı qánigelestirilgen mektepke shekemgi bilimlendiriw shólkeminde sáne múnásibeti menen bayram ilajı bolıp ótti.  

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, bul jerde tárbiyalanıp atırǵan balalardı bayram múnásibeti menen qutlıqladı. 

Aytıp ótiw orınlı, búgingi kúnde elimizde Húrmetli Prezidentimizdiń basshılıǵında jaslardıń, balalardıń bilim alıwı, salamatlıǵınıń bekkem bolıwı, barkamal insan bolıp kamalǵa keliwi ushın kóplegen iygilikli isler ámelge asırılmaqta. Eń shetki aymaqlarda da zamanagóy balalar baqshaları, mektepler, mádeniyat hám sport obektleri paydalanıwǵa tapsırılıp atır.

Elimizde hesh bir bala itibardan shette qalmaydı. Aralboyı balaları ushın arnawlı qurılǵan bul reabilitaciya orayına iye balalar baqshasında da bir qatar tárbiyalanıwshılar oqıp, bilim almaqta. Sonday-aq, salamatlıǵın tiklep atır. Balalar ushın barlıq qolaylı sharayatlar jaratılǵan. Olardıń salamatlıǵı turaqlı qadaǵalawǵa alınǵan hám tájiriybeli medicina xızmetkerleri menen pedagog ustazlar kún-túni ayanbay miynet etpekte.

“Imkon” shólkeminde ótkerilgen ilajda Joqarǵı Keńes Baslıǵı tárepinen balalarǵa bayram múnásibeti menen sawǵalar tapsırıldı. 

Bayram ilajı balalardıń atqarıwındaǵı koncert baǵdarlaması menen dawam etti.