Beruniy rayonında xalıqtıń abadan turmısın támiyinlew baǵdarındaǵı jumıslar barıp kórildi
Qaraqalpaqstan Respublikası Joqarǵı Kenesiniń Baslıǵı Amanbay Orınbaev Beruniy rayonında bolıp, xalıqtıń turmıs sharayatın jaqsılaw hám qosımsha dáramat alıwına kómeklesiw, jańa jumıs orınların jaratıw bagdarında ámelge asırılıp atırǵan jumıslar menen tanıstı.
Dáslep, Joqarǵı Keńes Baslıǵı «Toqımashı» MPJ aymaǵında jańadan qurılıp atırǵan kóp qabatlı turaq jaylar quılısı menen tanıstı. Atap ótiw kerek, bıyılǵı jılda 7 hám 5 qabatlı ulıwma 24 kóp qabatlı jay qurılıwı belgilengen bolıp, qurılıs jumısları juwmaqlanǵannan soń 812 kvartira paydalanıwǵa tapsırıladı.
Bunnan soń, Prezidentimizdiń Qaraqalpaqstan ushın óz aldına qabıl etilgen 129-sanlı pármanı menen tikkeley jer alıp, xalıqqa xızmet kórsetiw ornın qurıp atırǵan «Shox Abbos Mirzo» JShJ jumısları, sonday-aq, rayon orayındaǵı Tórtkúl kóshesinde ámelge asırılıp atırǵan rekonstrukciya jumısları barıp kórildi. Juwapkerlerge qurılıs jumısların sapalı hám óz waqtında ámelge asırıw boyınsha anıq tapsırmalar berildi.
Beruniy rayonlar aralıq Perinatal orayında sanlastırıw boyınsha alıp barılǵan jumıslar kózden ótkerildi. Puqaralarǵa sapalı xızmet kórsetiw baǵdarındaǵı jumıslar úyrenildi.
«Toqımashı» máhállesindegi «Oltin saodat asri» JShJ kárxanasında qurılıs hám xojalıq ónimlerin islep shıǵarıw jumısları kózden ótkerildi. Prezidentimiz tárepinen berilgen jeńillikler tiykarında isbilermen xızmet túrlerin keńeytip, ısıtıw qazanların, qurılıs-pardozlaw ónimleri, zamanagóy esikler islep shıǵarıw sıyaqlı jańa baǵdarlar boyınsha xalıqqa xızmet etpekte. Óz náwbetinde, juwapkerlerge isbilermenniń óz jumısın ele de keńeytiwi ushın barlıq járdemlerdi beriw boyınsha tapsırmalar berildi.
Rayonda ámelge asırılıp atırǵan jumıslar menen tanısıw barısında Joqarǵı Keńes Baslıǵı úy aldındaǵı qıytaq jerinde jılına bir neshe júz million sum dáramat alıwdı jolǵa qoyǵan Umar Masharipov, júzimshilik, kartoshka jetistiriw hám baǵshılıqtıń sırların tereń meńgergen Masharib Aitovtıń shańaraǵında boldı. «Bostan» máhállesiniń tájiriybesi Qaraqalpaqstan boyınsha en jaydırılǵanı, bul tájiriybeni ele de kópshilik xojalıqlar hám máhállelerge jetkeriw kerek ekenligi atap ótildi.
Toǵay xojalıǵı jer maydanları kózden ótkerildi. Gúzgi terek egiwge jerlerdi hám nálleri tayarlaw, jumıslardı shólkemleskenlik penen alıp barıw boyınsha juwapkerlerge tapsırmalar berildi.
Prezidentimizdiń qararı menen jaslarǵa 30 jılǵa berilgen jer maydanları, atap aytqanda «Saraykól» hám «Turan» máhálleleri aymaǵındaǵı «Bir kontur bir ónim» ólshemi tiykarında egilgen jerler barıp kórildi. Házirgi waqıtta qawın-ǵarbız hám basqa da palız ónimleri egilip, tez arada mol zúráát alınıwı kútilmekte.
fermer xojalıǵında shólkemlestirilgen jumıslar menen de tanıstı. Eksportbap miyweler, atap aytqanda, alma, erik, júzim sıyaqlı miyweli terekler egilgen maydanlar búgin miywege kirgen. Íssıxanasında da mol ónim alınbaqta.
Beruniy rayonındaǵı diyqanshılıq, baǵshılıq, qıytaq jerden mol dáramat alıw boyınsha bay tájiriybe barlıq qala hám rayonlarımızda usınday úlgi tiykarında shólkemlestirilse, kópshiliktiń joqarı dáramat alıwına, jumıs orınları jaratılıp, xalıqtıń abadan turmısı arttırılıwına erisiletuǵınlıǵı ayrıqsha tilge alındı.
