Qaraqalpaqstan Respublikası Joqarǵı Keńesiniń úshinshi sessiyası haqqında málimleme
2025-jıldıń 11-aprel kúni Qaraqalpaqstan Respublikası Joqarǵı Keńesiniń úshinshi sessiyası ótkerildi.
Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika sektor hám taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.
Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı.
Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.
Sessiyada Qaraqalpaqstan Respublikası Joqarǵı Keńesiniń Baslıǵı Amanbay Orınbaev sońǵı jıllarda húrmetli Prezidentimizdiń baslaması menen elimizdiń barlıq tarawlarında tariyxıy ózgerisler menen jańalanıwlar júz berip atırǵanlıǵın atap ótti.
Usı tariyxıy waqıyalardıń biri sıpatında jaqında Oraylıq Aziya regionında birinshi márte óz ishine 181 milliy parlament hám 15 regionallıq awqamdı birlestirgen Parlamentler aralıq awqamnıń 150-yubiley Assambleyası ótkerildi. Onda Prezidentimiz bul Assamblya Ózbekstannıń baslaması menen “Sociallıq rawajlanıw hám ádillik ushın parlament háreketi” temasında ótkerilip atırǵanına ayrıqsha itibar qarattı.
Elimizde bıyılǵı jıldıń «Qorshaǵan ortalıqtı qorǵaw hám jasıl ekonomika jılı» dep járiyalanǵanı Aralboyı regionı ushın oǵada áhmiyetli bolıp tabıladı. Jaqında Samarqand qalasında bolıp ótken Xalıqaralıq klimat forumında húrmetli Prezidentimiz keń jámiyetshiliktiń itibarın jáne bir márte Aral apatshılıǵına qaratqanı hám bir qatar baslamalardı ilgeri súrgeni, sonday-aq, Nókis qalasında ótkerilgen birinshi xalıqaralıq «Aral mádeniyatı sammiti»nde Aral teńiziniń ekologiyalıq mashqalası, xalqımız táǵdiri hám elimiz keleshegi menen baylanıslı oǵada áhmiyetli wazıypalar belgilep alınǵanı elimiz turmısındaǵı tariyxıy waqıyalar qatarına kiredi.
Bunnan tısqarı, Prezidentimizdiń qollap-quwatlawı nátiyjesinde sońǵı jılları bir qatar xalıqaralıq ilajlar Qaraqalpaqstanda ótkerilip atırǵanı xalqımızdıń bay mádeniyatın, turizm potencialın dúnya keń jámiyetshiligine tanıtıwda, shet el investorların regionımızǵa tartıp, islep shıǵarıw hám qayta islew quwatlılıqların keńeytiwde, jańa jumıs orınların jaratıwda áhmiyetli orın tutpaqta.
Sessiyada Joqarǵı Keńes Baslıǵı Qaraqalpaqstan ushın óz aldına qabıl etilip atırǵan qarar hám pármanlar tiykarında usınday keń imkaniyatlar jaratılıp berilip atırǵanlıǵın atap ótti.
Sessiya kún tártibindegi dáslepki másele Qaraqalpaqstan Respublikasınıń «Jer haqqındaǵı» Nızamına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń agrar, suw xojalıǵı, tábiyattı qorǵaw hám ekologiya máseleleri komiteti baslıǵı A.Jumanazarov bayanat jasadı.
Nızam joybarı menen «Jer haqqındaǵı» Nızamnıń bir qatar statyalarına ózgeris hám qosımshalar kirgizilmekte.
Nızam joybarınıń qabıl etiliwi Qaraqalpaqstan Respublikasına investiciyalardı jáne de keńnen tartıw hám aymaǵımızdıń sociallıq hám ekonomikalıq rawajlanıwın jańa basqıshqa alıp shıǵıwǵa xızmet etedi.
Kún tártibindegi dáslepki másele tolıq qarap shıǵıldı hám deputatlar tárepinen qarar qabıl etildi.
Kún tártibindegi keyingi másele Qaraqalpaqstan Respublikası Densawlıqtı saqlaw ministrligine Parlamentlik soraw jiberiw tuwralı bolıp, bul másele boyınsha Joqarǵı Keńestiń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti baslıǵı M.Atamuratov bayanat jasadı.
Onda onkologiyalıq keselliklerdi erte basqıshta anıqlaw, analıqtı hám balalıqtı qorǵaw, sırt el kompaniyalarınıń dárilerin tiykarsız buyırıw jaǵdaylarına shek qoyıw, tarawda byudjet qarjılarınıń maqsetli jumsalıwın támiyinlew hám korrupciyaǵa qarsı gúresiw baǵdarındaǵı unamsız jaǵdaylarǵa alıp keletuǵın sebep hám sharayatlar, olardıń aqıbetleri boyınsha analizlengen jumıslar hám basqa da máseleler keń túrde sóz etildi.
Bunnan soń kún tártibindegi másele tolıq qarap shıǵılıp, deputatlar tárepinen arnawlı qarar qabıl etildi.
Kún tártibindegi keyingi másele Ózbekstan Respublikası Prezidentiniń «Ózbekstan Respublikasında sharwashılıq tarawı hám onıń tarmaqların rawajlandırıw boyınsha 2022-2026-jıllarǵa mólsherlengen baǵdarlamasın tastıyıqlaw haqqında»ǵı qararı talaplarınıń Qaraqalpaqstan Respublikasında orınlanıw barısı boyınsha Ministrler Keńesiniń esabatı tuwralı bolıp, bul másele boyınsha Ministrler Keńesi Baslıǵınıń awıl hám suw xojalıǵı máseleleri boyınsha orınbasarı - Awıl xojalıǵı ministri Sh.Teshaev bayanat jasadı.
Bul másele de tolıq qarap shıǵıldı hám deputatlar tárepinen qarar qabıl etildi.
Bunnan soń kún tártibindegi keyingi másele boyınsha puqaralardıń huqıqların qorǵaw, jınayatshılıqtıń aldın alıw hám jınayatshılıqqa qarsı gúresiw baǵdarında 2024-jılda ámelge asırılǵan jumıslar haqqında Qaraqalpaqstan Respublikası prokurorı E.Tadjievtiń málimlemesi tıńlandı.
Bul máselede tolıq qarap shıǵıldı hám deputatlar tárepinen qarar qabıl etildi.
Kún tártibindegi keyingi másele Oraylıq banktiń Qaraqalpaqstan Respublikası Bas basqarması tárepinen 2024-jıl dawamında ámelge asırılǵan jumısları haqqında Oraylıq banktiń Qaraqalpaqstan Bas basqarması baslıǵınıń esabatı tuwralı bolıp, bul másele boyınsha Bas basqarma baslıǵı A.Isakov bayanat jasadı.
Búgingi kúnde, Qaraqalpaqstan Respublikası aymaǵında 13 kommerciyalıq bankleri hámde olardıń qala hám rayonlarda 89 dan artıq bank xızmetlerin kórsetiw orayları hámde mini bankleri tárepinen xalıqqa zamanagóy bank xızmetleri kórsetilip kelinbekte.
Banklerdiń turaqlı resurs bazasın bekkemlew ilajları nátiyjesinde 2025-jıl 1-yanvar jaǵdayına xalıqtıń hám de xojalıq júrgiziwshi subektlerdiń banklerdegi depozitler kólemi ótken jıldıń usı dáwirine salıstırǵanda 33,7 payızǵa kóbeydi.
Naq pulsız esap-kitaplar sistemasın jánede rawajlandırıw barısında kórilip atırǵan is-ilajlar nátiyjesinde aylanısqa shıǵarılǵan plastik kartochkalar sanı 2 mln. 550 mıń danaǵa hámde sawda hám pullıq xızmet kórsetiw shaqapshalarına ornatılǵan tólem terminalları sanı 21 mıń 696 danaǵa jetti.
Sonday-aq, Prezidentimizdiń qarar hám pármanları tiykarında kóp qabatlı úy-jay, massivler qurılısı, ipoteka kreditleri, mámleketlik baǵdarlamalar, isbilermenlikti qollap-quwatlaw boyınsha bank kreditleri ajıratılıwı támiyinlengen. Mashqalalı kredit qarızdarlıqlardı qısqarttırıw boyınsha da ilajlar alıp barılmaqta.
Gezektegi másele boyınsha deputatlar tárepinen qarar qabıl etildi.
Bunnan soń Ózbekstan Respublikası Prezidentiniń «Ózbekstan máhálleleri awqamı jumısın jolǵa qoyıw hám máhállelerde basqarıw sistemasın jetilistiriwge baylanıslı qosımsha ilajlar haqqında»ǵı qararınıń aymaqlarda orınlanıwı boyınsha Máhálleler awqamı Qaraqalpaqstan Respublikası basqarması baslıǵınıń esabatı tuwralı bolıp, bul másele boyınsha basqarma baslıǵı S.Turmanov bayanat jasadı.
Bul másele de tolıq qarap shıǵıldı hám deputatlar tárepinen qarar qabıl etildi.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw máselesi haqqında bolıp, bul másele de tolıq qarap shıǵıldı.
Kún tártibindegi másele boyınsha deputatlar tárepinen qarar qabıl etildi.
Usınıń menen Qaraqalpaqstan Respublikası Joqarǵı Keńesiniń úshinshi sessiyası óz jumısın juwmaqladı.