Qaraqalpaqstan Respublikası Joqarǵı Keńesiniń birinshi sessiyası haqqında málimleme

Usı jıl 6-noyabr kúni Nókis qalasında Qaraqalpaqstan Respublikası Joqarǵı Keńesiniń birinshi sessiyası bolıp ótti. Xabarıńız bar, usı jıldıń 27-oktyabr sánesinde mámleketimiz turmısında oǵada áhmiyetli bolǵan siyasiy process, parlament saylawları bolıp ótken edi. Onda Qaraqalpaqstan Respublikası Joqarǵı Keńesine 65, qalalıq hám rayonlıq Keńeslerge 375 deputat saylandı. Haqıyqatında da, usı saylanǵan deputatlar elimizdiń aldaǵı 5 jıllıq táǵdirin belgileydi. Sessiya jumısına Qaraqalpaqstan Respublikası Joqarǵı Keńesiniń deputatları, barlıq ministrlik, mákeme kárxana basshıları, ǵalaba xabar qurallarınıń wákilleri qatnastı. Reglamentke muwapıq dáslep, sessiya sekretariatı saylandı hám kún tártibi tastıyıqlandı. Kún tártibindegi birinshi másele boyınsha Qaraqalpaqstan Respublikası Oraylıq saylaw komissiyası baslıǵınıń usı jıldıń 27-oktyabr sánesinde bolıp ótken parlament saylawlarınıń nátiyjeleri haqqındaǵı málimlemesi tıńlandı. Onda atap ótilgenindey, Qaraqalpaqstan Respublikası Joqarǵı Keńesiniń deputatlıǵına saylaw demokratiyalıq tárizde, ashıq-aydınlıq principlerine ámel etken halda ótkerildi. 30-oktyabr kúni járiyalanǵan Joqarǵı Keńeske saylaw nátiyjelerine bola, deputatlar quramı 63 procentke jańalandı. Joqarǵı Keńeske jańadan saylanǵan deputatlardıń 32,3 procentin hayal-qız qurap, bul Qaraqalpaqstan tariyxındaǵı eń joqarı kórsetkish boldı. Kún tártibindegi keyingi másele, jańadan saylanǵan deputatlar arasınan Qaraqalpaqstan Respublikası Joqarǵı Keńesiniń Baslıǵın saylaw máselesi boldı. Qaraqalpaqstan Respublikası Joqarǵı Keńesi Reglamentiniń 14-statyasına muwapıq, siyasiy partiyalar frakciyaları basshılarınıń usınısı tiykarında qáliplestirilgen Aqsaqallar Keńesi tárepinen jańadan saylanǵan deputatlar arasınan 57-sanlı «Berdaq» saylaw okruginen Qaraqalpaqstan Respublikası Joqarǵı Keńesine deputat Amanbay Tilewbaevich Orınbaev Qaraqalpaqstan Respublikası Joqarǵı Keńesiniń Baslıǵı lawazımına usınıldı. Qaraqalpaqstan Respublikası Konstituciyasınıń 80-statyasına muwapıq Joqarǵı Keńes Baslıǵına talaban boyınsha Ózbekstan Respublikası Prezidentiniń kelisimi alındı. Bunnan soń, talabandı qollap-quwatlap 44-sanlı «Qanlıkól» saylaw okruginen deputat Oral Ataniyazova, 25-sanlı «Náwbáhár» saylaw okruginen deputat Ruzbiyke Aytbaeva, 45-sanlı «Shomanay» saylaw okruginen deputat Ulıǵbek Jalmenov, 53-sanlı «Qırantaw» saylaw okruginen deputat Sherzod Niyazımbetov, 65-sanlı «Moynaq» saylaw okruginen deputat Biybixan Utambetovalar shıǵıp sóyledi. Nızamshılıqqa muwapık, Qaraqalpaqstan Respublikası Joqarǵı Keńesiniń Baslıǵı lawazımına kórsetilgen talabandı saylaw deputatlar tárepinen jasırın dawıs beriw arqalı ámelge asırıldı. Solay etip Amanbay Tileubaevich Orınbaev kandidaturası qollap-quwatlandı hám Qaraqalpaqstan Respublikası Joqarǵı Keńesiniń Baslıǵı lawazımına tastıyıqlandı.

Sessiyada Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, búgingi kúnde barlıq tarawlarda tikkeley Prezidentimizdiń baslaması menen ámelge asırılıp atırǵan keń kólemli reformalardıń nátiyjelerine, ásirese, Qaraqalpaqstanǵa bolǵan ayrıqsha itibar negizinde jaratılıp berilip atırǵan múmkinshiliklerge toqtap ótti hám bul iygilikli baslamalardı nátiyjeli dawam ettiriwge, xalqımızdıń turmıs abadanlıǵın támiyinnlewge bar kúsh, tájiriybesin jumsaytuǵının, bunday isenim ushın mámleketimiz basshısına, deputatlarǵa hám xalqımızǵa óz minnetdarshılıǵın bildirdi. Kún tártibindegi keyingi másele Qaraqalpaqstan Respublikası Ministrler Keńesiniń Baslıǵın saylaw boldı. Nızamshılıqqa muwapıq bul lawazımǵa talabandı Qaraqalpaqstan Respublikası Joqarǵı Keńesiniń Baslıǵı usınıs etedi hám Prezidenttiń kelisimi alınadı. Sessiyada Joqarǵı Keńes Baslıǵı tárepinen Ministrler Keńesiniń Baslıǵı lawazımına Farxad Urazbaevich Ermanovtıń kandidaturası usınıs etildi. Talaban aymaqtı sociallıq-ekonomikalıq rawajlandırıwdıń perspektivalı baǵdarlamasın deputatlardıń názerine usındı. Yaǵnıy, 2025-2027–jıllarda Qaraqalpaqstan Respublikasın kompleksli rawajlandırıw boyınsha arnawlı islep shıǵılǵan baǵdarlama oqıp esittirildi. Bunnan soń, Ózbekstan Respublikası Prezidentiniń kelisimi alındı. Sessiyada talabannıń kandidaturasın qollap-quwatlap sózge shıqqanlar Farxad Ermanovtı Qaraqalpaqstan Respublikası Ministrler Keńesiniń Baslıǵı lawazımına múnásip ekenligin atap ótti. Solay etip, deputatlardıń dawıs beriw jolı menen Ermanov Farxad Urazbaevich Qaraqalpaqstan Respublikası Ministrler Keńesiniń Baslıǵı lawazımına tastıyıqlandı.

Sessiya kún tartibindegi gezektegi másele Qaraqalpaqstan Respublikası Joqarǵı Keńesi Baslıǵınıń orınbasarın saylaw haqqında boldı. Qaraqalpaqstan Respublikası Konstituciyasınıń 70-statyasına hám «Qaraqalpaqstan Respublikası Joqarǵı Keńesiniń Reglamenti haqqında»ǵı Nızamnıń 14-statyasına muwapıq 47-sanlı «Sanaat» saylaw okruginen deputat Rustam Tursınbaevich Saparbaev jasırın dawıs beriw jolı menen Qaraqalpaqstan Respublikası Joqarǵı Keńesi Baslıǵınıń orınbasarı etip saylandı. Bul boyınsha tiyisli qarar qabıl etildi.

Sessiyanıń kún tártibindegi keyingi másele boyınsha Qaraqalpaqstan Respublikası Joqarǵı Keńesiniń komitetlerin hám komissiyasın dúziw, olardıń quramın hám baslıqların saylaw haqqında másele kórip shıǵıldı. Onda 29-sanlı «Doslıq» saylaw okruginen deputat Berdibek Seytnazarov Qaraqalpaqstan Respublikası Joqarǵı Keńesiniń Byudjet, ekonomikalıq reformalar, investiciyalar hám innovaciya máseleleri komitetiniń baslıǵı;

46-sanlı «Ketenler» saylaw okruginen deputat Alisher Atajanov Qaraqalpaqstan Respublikası Joqarǵı Keńesiniń Sud-huqıq hám korrupciyaǵa qarsı gúresiw máseleleri komitetiniń baslıǵı;

37-sanlı «Xojeli» saylaw okuruginen deputat Islambek Sdiqov Joqarǵı Keńestiń Sanaat, qurılıs, transport hám málimleme texnologiyaları máseleleri komitetiniń baslıǵı;

2-sanlı «A.Dosnazarov» saylaw okuruginen deputat Murat Atamuratov Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komitetiniń baslıǵı;

64-sanlı «Qarakól» saylaw okuruginen deputat Anuarbek Jumanazarov Joqarǵı Keńestiń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı;

48-sanlı «Jińishke» saylaw okuruginen deputat Sharapat Ótemisov Qaraqalpaqstan Respublikası Joqarǵı Keńesiniń Jergilikli hákimiyattıń wákillikli hám puqaralardıń ózin-ózi basqarıw uyımları hám mámleketlik uyımlardıń ashıqlıǵın támiyinlew máseleleri komitetiniń baslıǵı;

1-sanlı «Botanika» saylaw okuruginen deputat Keńes Karimov Joqarǵı Keńestiń Reglament hám deputatlıq ádeplilik máseleleri komissiyasınıń baslıǵı etip saylandı. Deputatlar bul boyınsha tiyisli qarar qabıl etti.

Sessiyada Ózbekstan Respublikası Prezidentiniń keńesgóyi T.Xudaybergenov qatnastı hám shıǵıp sóyledi. Usınıń menen Qaraqalpaqstan Respublikası Joqarǵı Keńesiniń birinshi sessiyası óz jumısın juwmaqladı.