Shımbay rayonında xalıqtıń turmıs abadanlıǵın arttırıw baǵdarında ámelge asırılǵan jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonında jumıs alıp barıp atırǵan isbilermenlik subektler hám puqaralardıń qosımsha dáramat alıwına kómeklesiw baǵdarında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı «Shaxtemir» MPJdaǵı mebel islep shıǵarıwdı jolǵa qoyǵan «PRIME MAXIMUS» JShJ kárxanası, qurılıs materialların islep shıǵarıwshı «ShAXTEMIR PIK STROY» shańaraqlıq kárxanası hám «UBAYDULLA UBEK» JShJ káranaları jumısların barıp kórdi. 

«Temir jol gúzarı» MPJ aymaǵında óz úyinde milliy qara úy dáskelerin islewdi jolǵa qoyǵan Azat Kolbaybanov shańaraǵında shólkemlestirilgen jumıslar da kózden ótkerildi. Juwapkerlerge isbilermenlerdiń óz jumısın keńeytiwi hám rawajlandırıwı ushın barlıq járdemlerdi kórsetiw, Prezidentimiz tárepinen berilgen ayrıqsha jeńilliklerden nátiyjeli paydalanıw boyınsha tapsırmalar berildi.

Joqarǵı Kenes Baslıǵı «Gúlistan » MPJdaǵı gúlshilikti jolǵa qoyǵan Mavluda Alimbetova sonday-aq, balıq jetistiriwdi jolǵa qoyǵan «Temir jol gúzarı» turǵını Turǵanbay Erejepov shańaraqlarında boldı. Qıytaq jerdi dáramat deregine aylandırıw boyınsha jolǵa qoyılǵan jumıslardı ele de keń túrde dawam ettiriw kerek ekenligi atap ótildi.

Bunnan soń «Tazǵara» MPJda jaslar menen ushırasıw ótkerilip, olardıń bántligin támiyinlew hám qosımsha dáramat alıwına kómeklesiw baǵdarında ajıratılǵan jer maydanlarınan nátiyjeli paydalanıw kerek ekenligi, bunıń ushın barlıq járdemler beriletuǵınlıǵı atap ótildi. 

Joqarǵı Keńes Baslıǵı usı máhálle aymaǵındaǵı 52-sanlı shańaraqlıq poliklinikada sanlastırıw boyınsha alıp barılǵan jumıslar menen jaqınnan tanıstı. Jumıs processlerin kózden ótkerip, ele de ámelge asırıwı tiyis wazıypalar boyınsha juwapkerlerge anıq tapsırmalar berildi.