Joqarǵı Keńes Baslıǵı Ellikqala rayonında xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanıstı

Dáslep, Joqarǵı Keńes Baslıǵı «Zarbdor» tájiriybesi boyınsha Aqshakól boyında ulıwma 73,4 mlrd. sum qarjı tiykarında ámelge asırılıp atırǵan rekreacion zonanı shólkemlestiriw joybarın barıp kórdi. Joybar iske túsiwi menen 75 jumıs ornı jaratıladı. 

Bunnan soń ishimlik suwların islep shıǵarıp atırǵan «GOLD NEO BOSTON» JShJ, «Shopan» máhállesindegi «MUSLIMBEK PAYPOQLARI» shańaraqlıq kárxanası, «Sarabiy» máhállesindegi mebel, temir ónimlerin islep shıǵarıwshı «GRACEFUL MEBEL» kárxanası, «Qirqqizobod» APJdaǵı balalar oyınshıqların islep shıǵarıwshı «KUMUSH MUNISA» jeke menshik kárxanası jumısları menen tanısıldı. Isbilermenlerdiń óz jumısların ele de keńeytiwi ushın barlıq járdemlerdi kórsetiw, olardı barqulla qollap-quwatlaw boyınsha juwapkerlerge tapsırmalar berildi. 

Sonıń menen birge rayondaǵı «BO‘STON SILK» JShJ tárepinen ámelge asırılıp atırǵan pilleshilik boyınsha joybar kózden ótkerildi. Atap ótiw kerek, 2025-jıl báhárgi pilleshilik máwsiminde 254 fermer xojalıǵı hám 973 jumıstı úyde bólip alıp islewshiler menen pille jetistiriw boyınsha shártnamalar dúzilgen. Máwsim juwmaǵında 202,2 tonna pille tapsırıldı hám reje 100,1 procentke respublikamızda birinshilerden bolıp orınlandı. Joqarǵı Kenes Baslıǵı pilleshilik boyınsha Ellikqala tájiriybesin barlıq rayonlarda keńnen en jaydırıw kerek ekenligin atap ótti.

Prezidentimizdiń qararı menen jaslarǵa berilgen jer maydanları, atap aytqanda «Dumanqala» MPJdaǵı «Bir kontur bir ónim» ólshemi tiykarında egilgen jerler barıp kórildi. Házirgi waqıtta qawın-ǵarbız hám basqa da palız ónimleri egilip, tez arada mol zúráát alınıwı kútilmekte.

Joqarǵı Keńes Baslıǵı «Sarabiy» MPJdaǵı 63-sanlı shańaraqlıq poliklinikadaǵı sanlastırıw jumısları, sonday-aq, aralıqtan xızmet kórsetiwshi «ELLIKQAL’A BPO» orayındaǵı til úyretiw hám IT  kursları, IT xızmetlerin usınıw jumısların kózden ótkerdi. Sanlastırıw hám informaciya texnologiyalarınıń turmısımızda áhmiyeti artıp baratırǵanlıǵı ayrıqsha tilge alındı.

Bunnan soń «Sayxunabad» tájiriybesi tiykarında «Paxtashı» máhállesindegi Jumaniyazov Xudoyor hám Rozmetov Anvardıń qıytaq jerden nátiyjeli paydalanıw boyınsha jumısları kózden ótkerildi. Ellikqalalılarǵa tán miynetkeshlik hám azǵana jerden mol zúráát alıw tájiriybesi kópke úlgi bolıwı kerek ekenligi atap ótildi.