Biyday orımı aldınan kórgizbeli seminar ótkerildi

Búgin Beruniy rayonında usı jılǵı biyday orımına baǵıshlanǵan kórgizbeli seminar bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, mol zúráát jetistiriwde alıp barılıp atırǵan ámeliy ilajları ushın óz minnetdarshılıǵın hám biydaydan biyik qırman jaratılıwına tilekleslik bildirdi.

Seminarda Ministrler Keńesiniń Baslıǵı F.Ermanov, barlıq rayon hákimleri, taraw juwapkerleri qatnastı.

Ilaj aldınan jası úlkenler tárepinen diyqanlarımızdıń aldında turǵan mashaqatlı hám juwapkershilikli islerinde kúsh-quwat, elimizde molshılıq, dasturxanımız tolı bolıwın tilep, quran oqıldı. 

Seminarda dawam etetuǵın orım-jıyın mapazında ámelge asırılatuǵın jumıslar keńnen túsindirildi.

Atap ótiw orınlı, bıyılǵı jıl diyqan hám fermerlerimiz ushın “Ǵálle jılı” boldı, desek qátelespeymiz. Sebebi, kóp jıllıq tájiriybeden belgili báhár aylarında jawın-shashın muǵdarınıń kóp bolıwı hámde ǵálle ósip rawajlanıwı ushın hawa-rayınıń optimal keliwi – zúrááttiń mol bolıwına unamlı tásir kórsetedi.
Jetistirilgen biydaydı qısqa múddetlerde shólkemleskenlik penen orıp-jıynap alıw boyınsha talap etiletuǵın qarjılardıń esap-kitapları islep shıǵılǵan. Orım-jıyım jumısların shólkemleskenlik penen ótkeriw maqsetinde otryadlar dúzilip, olarǵa arnawlı mashina-mexanizmler, texnika hám agregatlar biriktirildi. Janılǵı may materialları qorı jaratıldı.