Joqarǵı Keńes Baslıǵı mánzil koloniyadaǵı jaslar menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Jaslar aylıǵı» sheńberinde Qońırat rayonındaǵı mánzil koloniyalardıń birinde jaza múddetin ótep atırǵan jaslar menen ushırastı. 

Onda dáslep, Joqarǵı Kenes Baslıǵı elimizde jaslarǵa qaratılıp atırǵan itibar mámleketlik siyasattıń baslı baǵdarlarınıń birine aylanǵanı, usı tiykarda olardıń óz qabiletin júzege shıǵarıwı, tereń bilim iyelewi, ozıq oylı hám ana Watanımızǵa sadıq xızmet etetuǵın pidayı insanlar bolıp kamalǵa keliwine sharayatlar jaratılǵanlıǵın atap ótti.

Sonıń menen birge, mámleketimizdiń mıń-mıńlap jasları qatarında turmıs jollarında azǵana adasıp, búgingi kúnde mánzil koloniyalarında múddetin ótep atırǵan jaslar da itibardan shette qalmaytuǵınlıǵı, olardıń tez arada jámiyetke aralasıp, óz ornın tabıwı ushın jaqınnan járdem beriletuǵınlıǵı ayrıqsha tilge alındı. 

Óz náwbetinde, ótkerilgen ushırasıwda jaslar da bul orında bos waqıtlarınan únemli paydalanıp, kásip-óner iyelewge bolǵan qızıǵıwshılıqları hám ózleriniń tilek-ótinishlerin bildirdi. 

Ushırasıwda barlıq kóterilgen máseleler belgilep alınıp, tez pursatta ámeliy ilajlardı kóriw boyınsha jwapkerlerge tapsırmalar berildi. Sonday-aq, jaslardıń IT tarawın hám shet tillerin úyreniwi ushın Joqarǵı Keńes Baslıǵı tárepinen arnawlı kompyuterler hám kitaplar tapsırıldı.

Bunnan soń, Joqarǵı Keńes Baslıǵı mánzil koloniyada jaslardıń bos waqıtlarınan únemli paydalanıwı ushın jumıs alıp barıp atırǵan kásipke baǵdarlaw orınları menen jaqınnan tanıstı.

Jaslardıń paydalı jumıs penen shuǵıllanıwı, ilim hám óner úyreniwi ushın elede kóbirek imkaniyatlar jaratıw boyınsha tapsırmalar berildi.