Elimizdiń Shveciya hám Polsha mámleketlerindegi elshileri menen ushırasıw shólkemlestirildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev elimizdiń Shveciyadaǵı ayrıqsha hám tolıq huqıqlı elshisi Rahmatulla Nurimbetov hám elimizdiń Polshadaǵı ayrıqsha hám tolıq huqıqlı elshisi Amirsaid Azamxwjaevlar menen ushırastı.

Onda Joqarǵı Keńes Baslıǵı sońǵı jılları mámleketimiz basshısınıń baslaması menen Aralboyın sociallıq-ekonomikalıq rawajlandırıw, ekologiyalıq jaǵdaydı jaqsılaw, xalıqtıń jasaw sharayatların jaqsılaw baǵdarında ámelge asırılıp atırǵan keń kólemli reformalarǵa toqtap ótti.

Atap ótilgenindey, aymaqqa sırt el investorların tartıw, isbilermenlikti qollap-quwatlaw, sırt elli sherikler menen birgeliktegi joybarlardı tabıslı ámelge asırıw hám elimizdiń milliy máplerin bekkemlewde sırt mámleketlerdegi elshilerdiń ornı oǵada sheksiz. Prezidentimizdiń baslaması menen mámleketimizdiń sırt eldegi diplomatiyalıq wákilxanalarınıń basshıları Qaraqalpaqstanǵa kelip atır. Óz gezeginde orınlarda shólkemlestirilip atırǵan sóylesiwler hár tárepleme paydalı bolıp, aymaqtı rawajlandırıwda úlken áhmiyetke iye bolmaqta.

Ótkerilgen ushırasıwda mámleketimizdiń sırt mámleketlerdegi elshileri shın júrekten qabıllaǵanı ushın minnetdarshılıq bildirip, keleshekte Aralboyı regionın bunnan bılay da rawajlandırıw, sırt mámleketler menen birgeliktegi joybarlardı ámelge asırıw, investorlardı tartıw boyınsha óz pikir-usınısların bildirdi.