Joqarǵı Keńes Baslıǵı Qońırat rayonındaǵı jaslar menen jaqınnan pikirlesti
Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń «Jaslar aylıǵı» sheńberinde Qońırat rayonındaǵı belsendi jaslar menen ushırasıwı ótkerildi. 
Ushırasıw sheńberinde dáslep, bos jumıs orınları miynet yarmarkası ótkerildi. Yarmarkada 44 mákeme-shólkemler 154 bos jumıs orınları menen qatnastı. Onda bir qatar jaslar jumıs orınlarına jaylastırılǵan bolsa, jáne bir topar hayal-qızlarǵa qayta kásipke baǵdarlaw boyınsha jollamalar berildi. Bunnan soń IT tarawı qánigeleri tárepinen tarawdı rawajlandırıw, IT xızmetlerin usınıwdı jolǵa qoyıw, azǵana qunt etiw arqalı mol dáramat alıwdı jolǵa qoyıw sonday-aq, Sırtqı biyǵárez járdem qarjıların (grantlardı) tartıw hám donorlar menen islesiw bólimi tárepinen jaslardıń isbilermenligin rawajlandırıw hám túrli joybarlar ústinde islewinde grant qarjıların keńnen tartıw boyınsha prezentaciyalar, maǵlıwmatlar usınıldı. Bunnan tısqarı, Prezidentimizdiń tapsırması menen jaslar banki sıpatında járiyalanǵan Aloqa banktiń Qaraqalpaqstan Respublikası basqarması baslıǵı, Milliy bankttıń juwapker qánigesi tárepinen jaslardıń isbilermenligin jolǵa qoyıw hám bar bolǵan joybarlardı keńeytiw boyınsha jaratılǵan imkaniyatlar haqqında keń túrde maǵlıwmat berildi.
Ushırasıwda dáslep respublikamız basshısı elimizde jaslardı hár tárepleme qollap-quwatlaw máselesi mámleketlik siyasattıń baslı baǵdarlarınıń birine aylanǵanı, húrmetli Prezidentimizdiń jaslarǵa degen joqarı isenimi, ayrıqsha itibarı hám atalarsha ǵamxorlıǵı nátiyjesinde olar ushın barlıq imkaniyatlar jaratılıp atırǵanlıǵın ayrıqsha qanaatlanıwshılıq penen atap ótti.
Aytıp ótilgenindey, húrmetli Prezidentimizdiń basshılıǵında jaslardı qollap-quwatlaw boyınsha bir qatar nızam, párman hám qararlar qabıl etildi, zamanagóy bilimlendiriw mákemeleri ashıldı, isbilermenlik baǵdarı boyınsha kóplegen jeńillikler berildi. Bilimlendiriw, mádeniyat, sport hám basqa da tarawlardaǵı jaslarımız materiallıq hám ruwxıy jaqtan qollap-quwatlanıp atır. Ásirese, Prezidentimizdiń 213-sanlı tariyxıy pármanı menen joqarı oqıw orınlarında qaraqalpaqstanlı jaslar ushın óz aldına qosımsha kvotalar ajıratılıp atırǵanı jaslarımız ushın jańa imkaniyatlar esigin ashıp bermekte. Álbette, jaslarımız ushın berilip atırǵan bunday múmkinshiliklerdi ele de dawam ettire beriwge boladı.
Óz náwbetinde, qońıratlı jaslar bunday itibar ushın húrmetli Prezidentimizge ayrıqsha minnetdarshılıǵın bildirdi.
Ótkerilgen ushırasıw dawamında jaslar menen jaqınnan pikirlesilip, olardıń tilek-ótinishleri, sonday-aq, usınısları tıńlandı. Atap aytqanda, jaslar tárepinen rayon aymaǵında zamanagóy kitapxana qurıw, isbilermenligin rawalandırıw, parasport penen shuǵıllanıw ushın qosımsha imkaniyatlar jaratıw, Barkamal áwlad balalar mektebinde laboratoriya hám IT kursların shólkemlestiriw sıyaqlı áhmiyetli máseleler kóterildi.
Óz náwbetinde hár bir baslama hám usınıs Joqarǵı Keńes Baslıǵı tárepinen belgilep alındı hám tez arada turmısqa engiziw boyınsha juwapkerlerge anıq tapsırma berildi.
Bunnan soń bir topar jaslar belsendiligi hám teńlesleri arasında ayrıqsha jetiskenliklerge erisip, kópshilikke úlgi bolıp atırǵanı ushın Qaraqalpaqstan Respublikası Joqarǵı Keńesi Prezidiumı qararı menen sıylıqlandı.
Ótkerilgen ushırasıw shın mánisinde Joqarǵı Keńes Baslıǵı hám jaslardıń tuwrıdan-tuwrı pikirlesiw maydanına aylandı hám bunday ushırasıwlar respublikamızdıń barlıq qala-rayonlarında dawam ettiriledi.
Ushırasıwdan keyin, Prezidentimizdiń Qaraqalpaqstan Respublikasındaǵı xalıq qabıllawxanası, Joqarǵı Keńestiń juwapkerleri hám taraw basshıları qatnasıwında jaslardıń mashqalalarına tıńlaw maqsetinde qabıllaw ótkerilip, sheshimin tabıw ilajları kórildi.
