Nókis qalasında xalıqaralıq investiciya forumı ótkerildi

Húrmetli Prezidentimizdiń tapsırması menen usı jıldıń 10-12-iyun kúnleri mámleketimiz paytaxtı Tashkent qalasında «Tashkent xalıqaralıq investiciya forumı» bolıp ótken edi. Forum sheńberinde ótkerilgen sessiyada Prezidentimizdiń járdemshisi Saida Mirziyoeva investorlardı Qaraqalpaqstan aymaǵına kelip, respublikanıń úlken potencialın óz kózleri menen kóriwge hám keń imkaniyatlar kólemin bahalawǵa mirát etti.

Búgin usı forumnıń dawamı sıpatında Nókis qalasındaǵı Aq quw kompleksinde Qaraqalpaqstannıń investiciyalıq potencialın tanıstırıwǵa arnalǵan xalıqaralıq investiciya forumı ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, húrmetli Prezidentimizdiń ayrıqsha itibarı menen Qaraqalpaqstanda isbilermenlikti rawajlandırıw hám qollap-quwatlaw, investiciyalıq tartımlılıqtı arttırıw boyınsha ayrıqsha qabıl etilgen párman hám qararları tiykarında jaratılǵan imkaniyatlar haqqında keń túrde atap ótti.

Ilajda Ministrler Keńesiniń Baslıǵı F.Ermanov qatnastı.

Ótkerilgen forumda respublikamızdıń investiciyalıq tartımlıǵı, jańa joybarlarlardı ámelge asırıw boyınsha bar bolǵan imkaniyatlar, resurslar potencialı hám basqa da áhmiyetli jónelisler haqqında sóz etildi.

Kompleks aymaǵındaǵı arnawlı pavilonda Qaraqalpaqstanda islep shıǵarılǵan ónimler kórgizbesi jıynalǵanlar názerine usınıldı.
 
Forum imkaniyatlardı dodalaw, isbilermenlik baylanısların ornatıw hám birgeliktegi jaybarlardı ámelge asırıw ushın ózine tán maydanǵa aylandı.

Bunnan soń miymanlar «QORAQALPOQ BASALTWOOL» kárxanası, sonday-aq, I.V.Savickiy atındaǵı Qaraqalpaq mámleketlik kórkem óner muzeyinde bolıp, respublikamızdıń sanaat, turizm baǵdarlarındaǵı imkaniyatları menen tanıstı.