Ámiwdáryalı jaslardıń pikir-usınısları tıńlandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev orınlarda jaslar menen ushırasıp, olardıń tilek-ótinishleri, baslama hám mashqalaların tıńlap atır. Usınday gezektegi ushırasıw Ámiwdárya rayonında ótkerildi.

Ushırasıwdan aldın bos jumıs orınları yarmarkası bolıp ótti. Bunnan soń IT  tarawı, Sırtqı biyǵárez járdem qarjıların (grantlardı) tartıw hám donorlar menen islesiw bólimi, kommerciyalıq bankler basshıları tárepinen seminarlar shólkemlestirilip, jaslardıń isbilermenligin jolǵa qoyıw, olardıń óz baslamaların ámelge asırıwı baǵdarında maǵlıwmatlar berildi.

Ótkerilgen ushırasıwda dáslep Joqarǵı Keńes Baslıǵı húrmetli Prezidentimizdiń ayrıqsha itibarı menen jaslarǵa jaratılǵan imkaniyatlar haqkında keń túrde atap ótti. Sonıń menen birge, usınday imkaniyatlardan orınlı paydalanıp, joqarı nátiyjelerge erisip atırǵan jaslar sanı artıp atırǵanı ayrıqsha qanaatlanıwshılıq penen tilge alındı. 

Óz náwbetinde, jaslar mámleketimiz basshısınıń bunday joqarı isenimi hám jaslarǵa kórsetip atırǵan atalarsha ǵamxorlıǵı ushın tereń minnetdarshılıǵın bildirdi.

Ótkerilgen ushırasıw dawamında jaslar menen jaqınnan pikirlesilip, olardıń tilek-ótinishleri, sonday-aq, usınısları tıńlandı. Onda bir qatar áhmiyetli baslamalar hám máseleler kóterildi.Óz náwbetinde hár bir baslama hám usınıs Joqarǵı Keńes Baslıǵı tárepinen belgilep alındı hám tez arada turmısqa engiziw boyınsha juwapkerlerge anıq tapsırma berildi.

Bunnan soń bir topar jaslar belsendiligi hám teńlesleri arasında ayrıqsha jetiskenliklerge erisip, kópshilikke úlgi bolıp atırǵanı ushın Qaraqalpaqstan Respublikası Joqarǵı Keńesi Prezidiumı qararı menen sıylıqlandı.