Ámiwdárya rayonında jańa jumıs orınların jaratıw baǵdarında ámelge asırılıp atırǵan jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonında jańa jumıs orınların jaratıw hám xalıktıń bántligin támiyinlew baǵdarında ámelge asırılıp atırǵan jumıslar menen jaqınnan tanıstı.

Dáslep, «Almazar» máhállesinde «Sulton Kumush» JShJ tárepinen ashılıw máresimi ótkerilip atırǵan «Balalar oyın maydanshası» joybarı kózden ótkerildi. Bunnan soń, hár birinde 10 jumıs ornı jaratılǵan «Botir-Xonqa» JShJ hám «Al Kafil Biznes Plast» JShJ kárxanalarınıń plastmassa ıdısların islep shıǵarıw joybarları, 2 mlrd. sumlıq qarjılar esabınan 20 jumıs ornı jaratılıwına erisilgen «Ravshanbek-Yulduzxon» jeke kárxanasınıń konditer, nan ónimlerin islep shıǵarıw hám sútti qayta islew, «Jayxun motors» JShJniń motoroller islep shıǵarıw joybarları kórip shıǵıldı. Jańa jumıs ornın jaratqan hár bir isbilermen barqulla qollap-quwatlanatuǵınlıǵı, olardıń óz jumısın ele de keńeytiwi ushın barlıq járdemler beriletuǵınlıǵı atap ótildi.


«Uyshin» máhállesinde «Jamoliddin Jayxun» JShJ tárepinen 1 mlrd. sum qarjı tiykarında jańadan iske túsirilgen balıqshılıq joybarı, sonday-aq, «Qoraqalpoq mahsulotlari» JShJ tárepinen 1,3 mlrd. sum qarjı tiykarında iske túsirilgen qusshılıqtı jolǵa qoyıw joybarı kózden ótkerildi. Xalqımızdı sapalı azıq-awqat ónimleri menen támiyinlew baǵdarındaǵı bunday baslamalardı kóbeytiwde bunnan bılay da jankúyerlik penen islew kerek ekenligi boyınsha juwapkerlerge tapsırmalar berildi.

«Dustlik» mákan puqaralar jıyını aymaǵında jańadan qurılıp atırǵan «Jańa Ózbekstan» massivindegi kóp qabatlı úyler qurılısı da kózden ótkerildi.  Atap ótiw kerek, 2024-2025-jıllarda ulıwma 18,5 gektar jer maydanında 26 kóp qabatlı úyler qurılıwı belgilengen. Házirgi waqıtta jumıslar dawam ettirilmekte. 

Joqarǵı Keńes Baslıǵı qurılıs jumısların sapalı etip, óz waqtında juwmaǵına jetkeriw boyınsha juwapkerlerge anıq tapsırmalardı berdi.