Joqarǵı Keńes Baslıǵı basshılıǵında Ámiwdárya rayonın rawajlandırıw máseleleri talqılandı

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonınıń sociallıq-ekonomikalıq rawajlanıwı máselelerine arnalǵan májilis ótkerdi.

Onda dáslep bıyılǵı orım-jıyını mapazın tabıslı juwmaqlap, respublikamızda birinshilerden bolıp rejeni orınlaǵan rayon ǵállekeshleri, bir topar miynet aldınǵıların Joqarǵı Keńestiń kókirek belgileri hám bahalı sawǵaları menen xoshametlew máresimi ótkerildi.

Bunnan soń kún tártibindegi máselelerge arnalǵan májilis bolıp ótti. Onda ámelge asırılıp atırǵan jumıslar boyınsha úyreniwler nátiyjeleri, rayondaǵı investiciyalıq joybarlar, ózin-ózi bánt etken puqaralardıń shańaraqlarında ámelge asırılıp atırǵan jumıslar kórip shıǵıldı. Sonday-aq, abadanlastırıw jumısları hám ekonomikalıq kórsetkishler talqılanıp, jollardı ońlaw, sociallıq obektlerdi qurıw hám rekonstrukciyalaw jumısları boyınsha bar bolǵan mashqalalar hám olardı sheshiw máseleleri kórip shıǵıldı. 

Májiliste tiykarınan xalıqtıń turmısında ushırasıp atırǵan mashqalalarǵa sheshim tabıw, belgilengen wazıypalardıń orınlanıwı barısı sıyaqlı áhmiyetli jumıslar sın kóz-qarastan kórip shıǵıldı.

Májilis dawamında Joqarǵı Keńes Baslıǵı tárepinen atap ɵtilgen kemshiliklerdi saplastırıw boyınsha tiyisli shólkem hám juwapkerlerge anıq wazıypalar belgilep berildi.