Joqarǵı Keńes Baslıǵı Nókis qalasındaǵı belsendi jaslar menen jaqınnan pikirlesti

Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Jaslar aylıǵı» sheńberinde Nókis qalasındaǵı belsendi jaslar menen ushırastı.


Ushırasıw sheńberinde dáslep,  IT tarawı qánigeleri tárepinen tarawdı rawajlandırıw, IT xızmetlerin usınıwdı jolǵa qoyıw, azǵana qunt etiw arqalı mol dáramat alıwdı jolǵa qoyıw sonday-aq, Sırtqı biyǵárez járdem qarjıların (grantlardı) tartıw hám donorlar menen islesiw bólimi, kommerciyaıq bankler tárepinen jaslardıń isbilermenligin rawajlandırıw hám túrli joybarlar ústinde islewi boyınsha prezentaciyalar, maǵlıwmatlar usınıldı.

Bunnan soń ótkerilgen ushırasıwda Joqarǵı Keńes Baslıǵı húrmetli Prezidentimizdiń ayrıqsha itibarı menen jaslarǵa jaratılǵan imkaniyatlar haqkında keń túrde atap ótti. Sonıń menen birge, usınday imkaniyatlardan orınlı paydalanıp, joqarı nátiyjelerge erisip atırǵan jaslar sanı artıp atırǵanı ayrıqsha qanaatlanıwshılıq penen tilge alındı. 

Óz náwbetinde, jaslar mámleketimiz basshısınıń bunday joqarı isenimi hám jaslarǵa kórsetip atırǵan atalarsha ǵamxorlıǵı ushın tereń minnetdarshılıǵın bildirdi.

Ótkerilgen ushırasıw dawamında jaslar menen jaqınnan pikirlesilip, olardıń tilek-ótinishleri, sonday-aq, usınısları tıńlandı. Onda bir qatar áhmiyetli baslamalar hám máseleler kóterildi.Óz náwbetinde hár bir baslama hám usınıs Joqarǵı Keńes Baslıǵı tárepinen belgilep alındı.

Bunnan soń bir topar jaslar belsendiligi hám teńlesleri arasında ayrıqsha jetiskenliklerge erisip, kópshilikke úlgi bolıp atırǵanı ushın Qaraqalpaqstan Respublikası Joqarǵı Keńesi Prezidiumı qararı menen sıylıqlandı.