Pitkeriwshi jaslarǵa saltanatlı túrde medallar tapsırıldı

Búgin Qaraqalpaqstan kórkem-óner sarayında respublikamızdaǵı mekteplerde barlıq pánlerden ayrıqsha bahalarda oqıp, juwmaqlawshı imtixanlardı tabıslı tapsırǵan pitkeriwshi jaslarımızǵa altın hám gúmis medalların tapsırıwǵa arnalǵan saltanatlı iláj ótkerildi. 

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq pitkeriwshi jaslardı qolǵa kirgizgen tabısları menen qutlıqladı. 

Búgingi kúnde jaslardı ilimli-bilimli, fizikalıq jaqtan salamat insanlar etip tárbiyalaw hám kamalǵa keltiriw – mámleketlik siyasattıń baslı baǵdarlarınıń birine aylanǵan. Sonlıqtanda, elimizde húrmetli Prezidentimizdiń basshılıǵında jaslardı hár tárepleme qollap-quwatlawǵa hám olardı múnásip xoshametlewge ayrıqsha itibar qaratılmaqta. Óz náwbetinde, kórsetilip atırǵan bunday itibar nátiyjesinde olar arasınan kóplegen qabiletli hám elimiz bayraǵın dúnyaǵa tanıtatuǵın jaslar jetilisip shıǵıp atır. 

Saltanatlı iláj dawamında pitkeriwshilerge arnalǵan medallar Joqarǵı Keńes Baslıǵı tárepinen tapsırıldı. 

Ilaj dawamında kórkem óner hám mádeniyat xızmetkerleri atqarıwındaǵı koncert baǵdarlaması jıynalǵanlar názerine usınıldı.