Qaraqalpaqstan - "Eco Expo Central Asia 2025" jetekshisi

Juwmaqlanǵan "Eco Expo Central Asia 2025" xalıqaralıq ekologiyalıq texnologiyalar kórgizbesinde Qaraqalpaqstan óz potencialın isenim menen kórsetip, birinshi orındı qolǵa kirgizdi hám turaqlı rawajlanıw hám ekologiyalıq innovaciyalar tarawında jetekshilerden biri sıpatında tán alındı.

19-21-iyun kúnleri Tashkentte bolıp ótken kórgizbede Oraylıq Aziya hám dúnyanıń túrli mámleketlerinen 200 den aslam qatnasıwshı qatnastı.

Kórgizbe juwmaǵında tóreshiler quramı Qaraqalpaqstannıń milliy hám xalıqaralıq ekologiyalıq kún tártibin ámelge asırıwǵa qosqan úlesin, sonday-aq, ilimiy jetiskenlikler, mámleketlik siyasat hám jergilikli baslamalardı tabıslı úylestiriwdi joqarı bahaladı. Respublikamız "Eco Expo Central Asia 2025" qatnasıwshıları arasında ulıwma reytingte birinshi orındı iyeledi.