Jaslar aylıǵı sheńberinde ushırasıwlar ótkerildi

 «Jaslar aylıǵı» sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Xojeli, Shomanay, Qanlıkól, Moynaq, Beruniy hám Ellikqala rayonlarında belsendi jaslar menen ushırasıw ótkerdi.


Ushırasıwlar sheńberinde málimleme texnologiyaları, sanlı xızmetler, startaplardı rawajlandırıw, xalıqaralıq grant qarjıların tartıw hám jaslar isbilermenligin qollap-quwatlaw máseleleri boyınsha tiyisli shólkemler, qánigelerdiń qatnasıwında maǵlıwmatlar hám prezentaciyalar usınıldı.

Onda mámleketimiz basshısınıń baslamaları menen jaslarǵa jaratılıp atırǵan imkaniyatlar, olardıń bilim alıwı, kásip ielewi, óz ideyaların ámelge asırıwı ushın jaratılıp atırǵan sharayatlar haqqında maǵlıwmat berildi. Sonday-aq, bul imkaniyatlardan paydalanıp, joqarı nátiyjelerge erisip kiyatırǵan jaslardıń sanı artıp atırǵanı atap ótildi.

Jańasha formatta ótken ushırasıwlarda jaslar tárepinen bilimlendiriw, IT tarawı, isbilermenlik jumısın keńeytiw sıyaqlı bir qatar usınıs hám baslamalar bildirildi. Kóterilgen máseleler dizimge alınıp, tiysli taraw basshılarına tapsırmalar berildi.

Jaslar, óz gezeginde, prezidentimiz tárepinen jaratılıp atırǵan imkaniyatlar hám kórsetilip atırǵan itibar ushın minnetdarshılıq bildirdi.

Sonday-aq, hár qıylı tarawlarda belsendiligi menen ajıralıp turǵan bir topar jaslar Qaraqalpaqstan Respublikası Joqarǵı Keńesi Prezidiumınıń qararına muwapıq sıylıqlandı.