Qanlıkól rayonında kóshe biyleri menen pikirlesilip, xalıqtıń turmıs sharayatın jaqsılaw boyınsha jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qanlıkól rayonında xalıqtıń abadan turmısın támiyinlew, jańa jumıs orınların jaratıw, qosımsha dáramat alıwına kómeklesiw baǵdarında ámelge asırılıp atırǵan jumıslar menen tanıstı. 

Dáslep, Toǵay xojalıǵı pitomniginde ámelge asırılıp atırǵan jumıslar kózden ótkerildi.  Bunnan soń «Beskópir» APJ aymaǵında jaslarǵa ajıratılǵan jer maydanları sonday-aq, Agrobank AJ tárepinen shólkemlestirilgen «Bir kontur – bir ónim» ólshemi tiykarında shólkemlestirilgen jumıslar barıp kórildi. 

Joqarǵı Keńes Baslıǵı «Arzımbetqum» APJdaǵı qıytaq jerinen nátiyjeli paydalanıp atırǵan Ótepbergenov Sársenbaydıń hám úy sharayatında xızmet kórsetiwdi jolǵa qoyǵan Sarsenbaeva Maxiranıń shańaraǵında bolıp, azǵana jerdi mol dáramat deregine aylandırıw boyınsha shólkemlestirilgen jumıslar menen tanıstı. Bunday jumıslardı awıl xalqı arasında ele de keńnen en jaydırıw kerek ekenligi atap ótildi. 

Bunnan soń Joqarǵı Keńes Baslıǵı «Mádeniyat» MPJdaǵı kóshe biyleri menen ushırastı. Olardıń tilek-ótinishlerin tıńladı. Mashqalalardı belgilep alıp, tez arada sheshimin tabıw boyınsha juwapkerlerge anıq tapsırmalardı berdi.

Rayon aymaǵındaǵı «Mebel Gold Jasmina» JShJ tárepinen mebel islep shıǵarıw joybarı hám «ABDIMURATOV TAZABAY» JShJniń konditer ónimlerin islep shıǵarıw joybarları kózden ótkerildi. Bunnan tısqarı, «LAN-S» kárxanası jumısları da úyrenildi. Isbilermenlerdi barqulla qollap-quwatlaw, olardıń óz jumısın ele de rawajlandırıwı ushın barlıq járdemlerdi kórsetiw boyınsha juwapkerlerge tapsırmalar berildi. 

Joqarǵı Keńes Baslıǵı rayon orayındaǵı aralıqtan xızmet kórsetiwshi BPO orayı menen de jaqınnan tanısıp, sanlastırıw hám informaciya texnologiyalarınıń turmısımızda áhmiyeti artıp baratırǵanlıǵı ayrıqsha tilge alındı.