Nókis rayonında kishi GESler iske túsirildi

Nókis rayonında qayta tikleniwshi energiya dereklerinen nátiyjeli paydalanıw, aymaqtı sapalı elektr energiyası menen támiyinlew maqsetinde ámelge asırılıp atırǵan jumıslardıń nátiyjesi sıpatında eki kishi gidroelektrstanciya (GES) qurılıp paydalanıwǵa tapsırıldı.

Atap aytqanda, "Aqterek" mákan puqaralar jıyını aymaǵında jaylasqan Bozataw kanalınıń aǵısınan paydalanǵan halda quwatlılıǵı 15 kilovatt bolǵan kishi GES qurıldı. 

Sonday-aq, "Kerder" awıl puqaralar jıyınına qaraslı "Qızıl úy" awılındaǵı Tórtkúl kanalınıń suw resursları tiykarında saatına 30 kilovatt elektr energiyasın islep shıǵaratuǵın kishi GESte iske qosıldı.

Bul xalıqtı hám átiraptaǵı sociallıq obektlerdi úzliksiz hám turaqlı elektr támiynatı menen támiyinlewge xızmet etedi. Sonıń menen birge, ekologiyalıq taza hám ekonomikalıq nátiyjeli energiya deregi sıpatında úlken áhmiyetke iye.

Ilajǵa Qaraqalpaqstan Respublikası Ministrler Keńesiniń Baslıǵı F.Ermanov, Nókis rayonı hákimi Z.Zaytov hám taraw basshıları qatnastı.

Ilaj dawamında kishi GESlerdiń texnikalıq imkaniyatları, islew mexanizmi hám olar arqalı únemlenetuǵın qarjılar haqqında tolıq maǵlıwmatlar berildi.