Shomanay rayonındaǵı máhállelerde puqaralar turmısın jaqsılaw boyınsha alıp barılıp atırǵan jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shomanay rayonında bolıp, puqaralardıń turmıs sharayatın jaqsılaw, qosımsha dáramat alıwına kómeklesiw boyınsha alıp barılıp atırǵan jumıslar menen tanıstı. 

Dáslep, «Qarabaylı» MPJda jaslar menen ushırasıw ótkerilip, olardıń bántligin támiyinlew hám qosımsha dáramat alıwına kómeklesiw baǵdarında ajıratılǵan jer maydanlarınan nátiyjeli paydalanıw kerek ekenligi, bunıń ushın barlıq járdemler beriletuǵınlıǵı atap ótildi.

Bunnan soń, «Birleshik» APJ aymaǵında balıqshılıq jónelisi menen shuǵıllanıwshı Jumabaeva Aynuranıń joybarı, «Mamıy» APJdaǵı Abadanlastırıw basqarmasınıń pitomnigi, «Monshaqlı» MPJdaǵı Salieva Seregúldiń qıytaq jeri kózden ótkerildi. 

Joqarǵı Keńes Baslıǵı «Aqjap» APJdaǵı kóshe biyleri menen de ushırastı. Olardıń kótergen pikir-usınısların tıńladı. Aldınǵı ushırasıwlarda bildirilgen mashqalalardıń kópshiligi óz sheshimin tawıp atırǵanlıǵı hám hesh bir másele itibardan shette qalmaytuǵınlıǵı atap ótildi. Óz náwbetinde, kóshe biyleri xalıqtıń mashqalaların sheshiwde basshılıq etip atırǵan húrmetli Prezidentimizge óz minnetdarshılıǵın bildirdi.

«Monshaqlı» MPJ aymaǵındaǵı «LIANTAI KC LICORICE» JShJniń investiciya joybarı, «Naubetova Altınay» jeke kárxanasınıń jumısları barıp kórildi. Hár qanday isbilermenlik baslaması qollap-quwatlanatuǵınlıǵı atap ótildi. 

Bunnan soń aralıqtan xızmet kórsetiwshi  BPO orayı hám rayonlıq medicina birlespesindegi sanlastırıw jumısları kózden ótkerildi.