Xojeli rayonında puqaralardıń bántligin támiyinlew hám qosımsha dáramat alıwına kómeklesiw boyınsha jumıslar kórip shıǵıldı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Xojeli rayonında xalıktıń bántligin támiyinlew, jańa jumıs orınların jaratıw hám isbilermenlikti rawajlandırıw baǵdarında ámelge asırılıp atırǵan jumıslar menen tanıstı.
Dáslep, «Sayxunabat» tájiriybesi tiykarında shólkemlestirilgen jumıslar, atap aytqanda, «Baǵman» MPJdaǵı gúlshilik penen shuǵıllanıp atırǵan Ametov Dawran, qıytaq jerinde ıssıxanadan ónim alıw hám sharwashılıqtı rawajlandırıw boyınsha jumıs alıp barıp atırǵan Saparniyazov Jienbay, «Samankól» MPJdaǵı qara malshılıq penen shuǵıllanıp atırǵan Ótemuratov Zafar, «Shaǵalakól»degi Nurımbetov Quwanıshtıń shańaraqlarına barıp kórildi. Jumıslar kózden ótkerilip, bunday tájiriybelerdi ele de keńnen en jaydırıw kerek ekenligi atap ótildi. 
Bunnan soń Jáhán bankiniń 135,6 mıń dollar grant qarjıları tiykarında shólkemlestirilgen qaramallardı jasalma kóbeytiwdiń zamanagóy usılı – «In vitro» texnologiyası boyınsha jumıs baslaǵan laboratoriya jumısları úyrenildi. 
Rayondaǵı isbilermenlik subektleri jumısları da kózden ótkerildi. Atap aytqanda, «DO`STLAR SHOES XO`JAYLI» JShJniń bılǵarı ayaq kiyim islep shıǵarıw, «INOSTAL» JShJniń temir ónimlerin islep shıǵarıw, «EXIMCORP» JShJniń boyan tamırdı qayta islewdi keńeytiw, «“FARMS GAFUR GULOM» JShJniń sútti qayta islew joybarları, «LIDERTEKS GROUP» JShJ hám «Urazimbetov Raxat» shańaraqlıq kárxanası jumısları kórip shıǵıldı. Isbilermenlerdiń óz jumısın ele de keńeytiwi ushın Qaraqalpaqstanda isbilermenlikti rawajlandırıw boyınsha óz aldına berilgen jeńilliklerden tolıq paydalanılıwına barlıq járdemlerdi beriw boyınsha juwapkerlerge tapsırmalar berildi.
Bunnan soń Joqarǵı Keńes Baslıǵı rayon orayında jańadan ashılıp atırǵan «Jaslar orayı» imaratında jaratılǵan imkaniyatlar menen jaqınnan tanıstı. Bul orın Xojeli jasların ózinde jámleytuǵın, olardıń barlıq qábiletin júzege shıǵarıwǵa járdem beretuǵın áhmiyetli orınǵa aylanıwı kerek ekenligi atap ótildi.
«Kulab» APJ aymaǵındaǵı Matkarimova Ayshanıń qıytaq jerinde shólkemlestirilgen jumıslar, «Mustaqıllıq» APJdaǵı Kuregenov Alpamıs fermer xojalıǵınıń sharwa komlpeksi barıp kórildi. Bunday joybarlar sanın ele de kóbeytiw kerek ekenligi atap ótildi. 
Joqarǵı Keńes Baslıǵı rayondaǵı ámelge asırılıp atırǵan jumıslar menen tanısıp, puqaralardıń qosımsha dáramat alıwına kómeklesiw, jańa jumıs orınların jaratıw hám isbilermenlikti qollap-quwatlaw boyınsha juwapkerlerge anıq tapsırmalardı berdi.
