Xojeli rayonın rawajlandırıw máseleleri kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında Xojeli rayonın sociallıq-ekonomikalıq jaqtan rawajlandırıw, xalıqtıń bántligin támiyinlew, mámleketlik baǵdarlamalar sheńberindegi belgilengen wazıypalar hám ámelge asırılıwı tiyis ilajlardıń orınlanıwına arnalǵan májilis ótkerildi. 

Onda respublikalıq mákeme, shólkem hám tiyisli ministrlikler, rayon juwapkerleri, máhálle belsendileri qatnastı. 

Májiliste dáslep, máhállelerdi abat etiw, infrastruktura menen baylanıslı mashqalalardı sheshiw, mámleketlik baǵdarlamalar sheńberinde joybarlardıń ámelge asırılıwı, jańa kárxanalar jumısların shólkemlestiriw, kóp qabatlı úylerdi qurıw, qayta tikleniwshi energiya dereklerin keńnen en jaydırıw, kámbaǵallıqtı qısqartıw, puqaralardıń turmıs dárejesin jaqsılaw barısında wazıypalardıń orınlanıwı máseleleri kórip shıǵıldı. 

Sonıń menen birge, puqaralardıń qosımsha dáramat alıwına kómeklesiw, qıytaq jerlerden nátiyjeli paydalanıwdı en jaydırıw, jaslardıń bántligin támiyinlew, isbilermenlikti rawajlandırıw, kárxanalar jumıslarına jaqınnan járdem beriw, bank xızmetlerin hám bazar infrastrukturasın jaqsılaw boyınsha da tapsırmalardıń nátiyjeleri sóz etildi. 

Onda sonday-aq, bul jumıslardı ámelge asırıwda barlıq sharayatlar jaratıp berilgeni, belgilengen wazıypalardı orınlawda qarjılıq derekler, barlıq resurslar iske salınǵanı atap ótilip, usınshama imkaniyat jaratılıwına qaramastan, ayırım juwapkerlerdiń óz wazıypasına nemquraydılıq penen qarap atırǵanı sınǵa alındı. 

Májilis dawamında kemshilikler atap ótilip, óz wazıypasın atqarıwda qáte-kemshiliklerge jol qoyǵan ayırım basshılarǵa intizamiy jaza-sharasın qollaw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.