Qaraqalpaqstan Respublikası Joqarǵı Keńesiniń besinshi sessiyası haqqında málimleme
Usı jıldıń 12-iyul kúni Qaraqalpaqstan Respublikası Joqarǵı Keńesiniń besinshi sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.
Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı.
Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.
Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.
Sessiyanıń kún tártibindegi dáslepki másele «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń komitet baslıǵı Alisher Atajanov bayanat jasadı.
Sessiyanıń kún tártibindegi dáslepki másele boyınsha qarar qabıl etildi.
Kún tártibindegi keyingi másele «Qayta tikleniwshi energiya dereklerinen paydalanıw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Sanaat, qurılıs, transport hám málimleme texnologiyaları máseleleri komiteti baslıǵınıń orınbasarı Jalǵasbay Berdixanov bayanat jasadı.
Atap ótiw orınlı, mámleketimizde energiya turaqlılıǵın támiyinlew, qayta tikleniwshi energiya dereklerin hám energiya únemlewshi texnologiyalardı eńgiziw, tarawdı mámleket tárepinen qollap-quwatlaw mexanizmlerin jetilistiriw baǵdarında isenimli qádemler taslandı hám salmaqlı nátiyjelerge erisildi. Bul baǵdarda úlken potencialǵa iye bolǵan Qaraqalpaqstan ushın elektr energiyasın islep shıǵarıw boyınsha úlken maqsetli rejeler belgilep alınǵan.
Bul nátiyjelerge erisiwde eń dáslep, tarawdıń huqıqıy tiykarın jetilistiriw talap etiliwi oǵada áhmiyetli bolıp, usı maqsette «Qayta tikleniwshi energiya dereklerinen paydalanıw haqqında»ǵı Qaraqalpaqstan Respublikası nızamı islep shıǵıldı.
Kún tártibindegi bul másele de tolıq qarap shıǵıldı hám deputatlar tárepinen qarar qabıl etildi.
Kún tártibindegi keyingi másele onkologiyalıq keselliklerdi erte basqıshta anıqlaw, analıqtı hám balalıqtı qorǵaw, sırt el kompaniyalarınıń dárilerin tiykarsız buyırıw jaǵdaylarına shek qoyıw, tarawda byudjet qarjılarınıń maqsetli jumsalıwın támiyinlew hám korrupciyaǵa qarsı gúresiw boyınsha Qaraqalpaqstan Respublikası Densawlıqtı saqlaw ministrligine jiberilgen Parlamentlik sorawınıń nátiyjesi tuwralı bolıp, bul másele boyınsha Densawıqtı saqlaw ministrligi M.Qurbanov shıǵıp sóyledi.
Bunnan soń kún tártibindegi másele tolıq qarap shıǵılıp, deputatlar tárepinen arnawlı qarar qabıl etildi.
Kún tártibinde «Kámbaǵallıqtan abadanlıqqa qaray» baǵdarlaması tiykarında belgilengen wazıypalardıń orınlanıwı boyınsha Qaraqalpaqstan Respublikası Kámbaǵallıqtı qısqartıw hám bántlik ministrligine parlamentlik soraw jiberiw tuwralı keyingi másele boyınsha Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komiteti baslıǵı Berdibek Seytnazarov bayanat jasadı.
Bul másele de tolıq qarap shıǵılıp, qarar qabıl etildi.
Bunnan soń kún tártibindegi keyingi másele boyınsha Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti tárepinen islenip atırǵan jumıslar haqqında Joqarǵı Keńestiń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti baslıǵı M.Atamuratovtıń málimlemesi tıńlandı.
Bul máselede tolıq qarap shıǵıldı hám deputatlar tárepinen qarar qabıl etildi.
Kún tártibindegi «Ózbekstan Respublikası Prezidentiniń “Ózbekstan-2030” strategiyası haqqında»ǵı Pármanınıń Qaraqalpaqstan Respublikasında orınlanıw barısı boyınsha Qaraqalpaqstan Respublikası Ministrler Keńesiniń esabatı tuwralı keyingi másele boyınsha Ministrler Keńesi Baslıǵınıń orınbasarı – Investiciyalar, sanaat hám sawda ministri Vladimir Jollıbekov bayanat jasadı.
Respublikamızda isbilermenlik jumısların elede rawajlandırıw, sırt el investiciyaların tartıw, eksporttı qollap-quwatlaw, investiciyalıq joybarlardı iske túsiriw arqalı jańadan islep shıǵarıw quwatlıqların hámde xalqımız ushın jańadan joqarı dáramatlı jumıs orınların jaratıw maqsetinde Ózbekstan Respublikasınıń basqa aymaqlarında engizilmegen imkaniyat hám jeńillikler jaratıp berildi. Usı tiykarda 2025-jıldıń ótken 6 ayı dawamında bir qatar unamlı jumıslar alıp barılıwı nátiyjesinde joqarı jetiskenliklerge erisildi.
Sonday-aq, «Ózbekstan – 2030» strategiyasına muwapıq, 2030-jılǵa shekem sırt el investiciya hám kreditlerin ózlestiriw, eksport prognoz kórsetkishleri hámde iri investiciyalıq joybarlardı iske túsiriw kórsetkishlerin jaqsılawda hár jılı basqıshpa-basqısh joqarı nátiyjelerge erisiw maqsetinde reje hám wazıypalar belgilep alınǵanlıǵı atap ótildi.
Kún tártibindegi bul másele de tolıq qarap shıǵıldı hám deputatlar tárepinen qarar qabıl etildi.
Kún tártibindegi keyingi másele xalıq arasında salamat turmıs tárizin qáliplestiriw, jaslardı dene tárbiya hám sportqa qamtıp alıw boyınsha alıp barılıp atırǵan jumıslar haqqında Qaraqalpaqstan Respublikası Sport ministriniń esabatı tuwralı bolıp, bul másele boyınsha Sport ministri Erkinbay Qutıbaev bayanat jasadı.
Atap ótiw orınlı, búgingi kúnde elimizde salamat turmıs tárizin qáliplestiriwge, xalıqtıń, ásirese, jas áwladtıń dene tárbiya hám sport penen turaqlı shuǵıllanıwı ushın zaman talaplarına say sharayatlar jaratıwǵa, sonday-aq, dene tárbiya hám ǵalabalıq sporttı bunnan bılay da rawajlandırıwǵa baǵdarlanǵan keń kólemli jumıslar ámelge asırılmaqta.
Ásirese, húrmetli Prezidentimiz basshılıǵında 2025-jıl 13-fevral kúni olimpiya hám paralimpiya háreketi, qánigelestirilgen hám ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıwǵa baǵıshlanǵan videoselektor májilisinde berilgen tapsırmalar bul baǵdardaǵı iygilikli islerdi jańa basqıshlarǵa kótermekte.
Sessiyada belgilep alınǵan wazıypalar, berilgen tapsırmalar tiykarında respublikamızda bir qatar ilajlarlar ámelge asırılıp, bul baǵdardaǵı jumıslar ele de dawam ettirilip atırǵanlıǵı atap ótildi.
Kún tártibindegi gezektegi másele qarap shıǵılıp, bul boyınsha deputatlar qarar qabıl etti.
Kún tártibindegi keyingi másele awıl xojalıǵında suw resurslarınan maqsetli paydalanıw, suw ısırapkershiligin kemeytiw hám suwdı únemlewge qaratılǵan ilajlardıń orınlanıw barısı haqqında Qaraqalpaqstan Respublikası Suw xojalıǵı ministriniń esabatı tuwralı bolıp, bul másele boyınsha Suw xojalıǵı ministri Baxtiyar Yusupov bayanat jasadı.
Bul másele de tolıq qarap shıǵıldı hám deputatlar tarepinen qarar qabıl etildi.
Sessiya kún tártibinde ózbasımshalıq penen iyelep alınǵan jer uchastkaları hám de olarda qurılǵan imaratlar menen obektlerge bolǵan huqıqlardı tán alıw tuwralı másele qarap shıǵıldı.
Atap ótiw orınlı, húrmetli Prezidentimizdiń tikkeley baslaması menen tek ǵana Qaraqalpaqstan ushın 119-sanlı arnawlı Párman qabıl etilip usı tiykarda, qala hám rayonlardaǵı jámi 27 mıń 590 kadastr hújjeti bolmaǵan turaq jaylarǵa iyelik etiw huquqı berildi hám kadastr pasportları islep shıǵılıp, mámleketlik dizimnen ótkerildi.
Bul iygilikli jumıslar ele de dawam ettirilip, «Ózbasımshalıq penen iyelep alınǵan jer uchastkalarına hámde olarda qurılǵan imaratlar hám obektlerge bolǵan huqıqlardı tán alıw haqqında»ǵı Ózbekstan Respublikasınıń arnawlı Nızamı qabıl etildi.
Sessiyada usı nızam basshılıqqa alınıp, ózbasımshalıq penen iyelep alınǵan jer uchastkasına bolǵan ijara huqıqı jáne de olarda qurılǵan imaratlar menen obektlerge bolǵan múlk huqıqı tán alınıp atırǵan 266 puqaranıń dizimi sessiya qararı menen tastıyıqlandı.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı.
Bunnan soń deputatlar tárepinen arnawlı qarar qabıl etildi.
Usınıń menen Qaraqalpaqstan Respublikası Joqarǵı Keńesiniń besinshi sessiyası óz jumısın juwmaqladı.