Qaraqalpaqstan delegaciyası qurılıs tarawındaǵı joybarlar boyınsha Qıtay mámleketi kompaniyası menen sóylesiwler alıp bardı

Qurılıs tarawındaǵı investiciyalıq joybarlardı dodalaw hám birge islesiwdi bekkemlew boyınsha Qaraqalpaqstan delegaciyası Qıtay Xalıq Respublikasına xızmet saparı menen bardı.

Sapar dawamında Joqarǵı Keńestiń komitet baslıǵı I.Sdikov «Chine MCC Group Co., Ltd» kompaniyası vice-prezidenti CHju Guansya menen ushırasıw ótkerdi.

Onda kompaniya wákilleri menen Xojeli rayonı aymaǵınan ótiwshi Nókis-Qońırat avtomagistral jol boyındaǵı 152 gektar jer maydanında «Jaslar sociallıq-ekonomikalıq orayı»n shólkemlestiriw joybarın ámelge asırıw máseleleri boyınsha sóylesiwler alıp barıldı.

Atap ótiw orınlı, bul iri joybar húrmetli Prezidentimizdiń Qaraqalpaqstan ushın óz aldına qabıl etilgen 129-sanlı pármanı tiykarında ámelge asırılıp atırǵan bolıp, joybarı sheńberinde ulıwma 5 hám 7 qabatlı 30 dan aslam turaq-jaylar, 160 tan aslam eki qabatlı úlgili jaylar, adminstrativlik imaratlar, sociallıq obektler, kompleks IT-park, xızmet kórsetiw obektleri, sanaat hám islep shıǵarıw orınları qurıladı.

Bunnan soń delegaciya aǵzaları «Chine MCC Group Co., Ltd» kompaniyası tárepinen alıp barılıp atırǵan iri joybarlar menen tanıstı.