Nókis rayonın hár tárepleme rawajlandırıw máseleleri kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonın sociallıq-ekonomikalıq jaqtan rawajlandırıw, berilgen tapsırmalardıń orınlanıwınıń támiyinleniwi máselelerine arnalǵan májilis ótkerdi. 

Onda respublikalıq mákeme-shólkemler, tiyisli ministrlik basshıları, rayon juwapkerleri hám máhálle belsendileri qatnastı. 

Sın kóz qarasta ótkerilgen májiliste xalıqtıń abadan turmıs keshiriwin támiyinlew, kámbaǵallıqtı qısqartıw, jańa jumıs orınların jaratıw, máhállelerdegi xalıqtıń tikkeley kewil-keypiyatına tásir etip turǵan mashqalalarǵa sheshim tabıw, belgilengen wazıypalardıń, mámleketlik baǵdarlamalar  sheńberindegi jumıslardıń orınlanıwı máseleleri kórip shıǵıldı. 

Sonday-aq, isbilermenlikti rawajlandırıwǵa kómeklesiw, puqaralardıń qosımsha dáramat alıwına jaqınnan járdem beriw, qıytaq jer mádeniyatın arttırıw, jaslardıń egislik maydanlarında dáramat alıwın támiyinlew sıyaqlı áhmiyetli máseleler de qarap shıǵıldı. 

Májilis dawamında óz wazıypasın orınlawda qáte-kemshiliklerge jol qoyıp atırǵan juwapkerler eskertilip, ayırımlarına intizamiy jaza sharaların qollaw boyınsha tapsırmalar berildi. 

Májiliste Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.