Bozataw rayonında xalıqtıń mashqalalarına sheshim tabıw hám qosımsha dáramat alıwına kómeklesiw boyınsha jumıslar kózden ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonında xalıqtıń bántligin támiyinlew, jańa jumıs orınların jaratıw hám mashqalalarǵa sheshim tabıw baǵdarında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı «Erkindárya» APJdaǵı kollektor boyında shólkemlestirilgen úyrek baǵıw joybarın kózden ótkerdi. Sonday-aq, «Erkindárya» APJdaǵı Óteniyazov Axmettiń pal hárreshilikti rawajlandırıw joybarı, «Qusxanataw» APJdaǵı Áljanov Ǵaybulla hám Tóremuratov Jamaladdinniń qıytaq jerlerinde shólkemlestirilgen jumıslar barıp kórildi. Qıytaq jer dáramat deregi al, bunday jumıslar hár bir úyde shólkemlestiriliwi, sonıń menen bir qatarda puqaralardıń bántligin támiyinlew, qosımsha dáramat alıwına kómeklesiw baǵdarında jańa joybarlardı kóbeytiw kerek ekenligi atap ótildi. 

Bunnan soń, «Erkindárya» APJdaǵı gaz tarmaǵı liniyasınıń 2 km bóleginde Bozataw tájiriybesi tiykarında ámelge asırılıp atırǵan jumıslar barıp kórildi. Onda artıqsha gaz jumsalıwınıń aldın alıw hám únemli paydalanıw boyınsha jumıslar kórip shıǵıldı. 

Joqarǵı Keńes Baslıǵı Ózbekstan kásiplik awqamları Federaciyası tárepinen 123 mlrd. sum muǵdarında qarjılandırılıp, qurılıs jumısları alıp barılıp atırǵan sanatoriya menen de jaqınnan tanıstı. Ulıwma 200 adamǵa mólsherlengen bul orın, xalqımızdıń densawlıǵın tiklewine barlıq múmkinshilikler jaratılatuǵın ayrıqsha máskanlardıń birine aylanatuǵınlıǵı atap ótildi. 

«Zarbdor» tájiriybesi tiykarında shólkemlestirilgen ónermentler alleyası, Jaslar orayında shólkemlestirilgen til úyreniw kursları jumısları da barıp kórildi. Xalqımız iygiligi jolında xızmet etetuǵın hár qanday baslama qollap-quwatlanatuǵınlıǵı atap ótildi. 


Bunnan soń, húrmetli Prezidentimizdiń tapsırması menen jaqında ornatılıp, paydalanıwǵa tapsırılǵan Bozataw rayonın hám arqa rayonlardı tikkeley Qońırat rayonı menen baylanıstırıwshı ponton kópir de barıp kórildi. Xalqımızdıń kewil-keypiyatına tásir etetuǵın hár qanday mashqalanıń sheshimin tabıwda Prezidentimizdiń ádil siyasatı turǵanı, bunnan puqaralardıń da sheksiz minnetdar ekenligi ayrıqsha qanaatlanıwshılıq penen tilge alındı.