Veteran futbolshılar Qaraqalpaqstan birinshiliginde bellesti

Nókis qalasında «Nuranıylar itibarda» súreni astında respublikamız nuranıyları arasında salamat turmıs tárizin úgit-násiyatlaw, olardıń fizikalıq belsendiligin arttırıw maqsetinde, 60 hám onnan joqarı jasta bolǵan veteran futbolshılar arasında sporttıń mini futbol túrinen Qaraqalpaqstan birinshiligi bolıp ótti.


«Nuranıy» fondı Qaraqalpaqstan Respublikası bólimi tarepinen shólkemlestirilgen bellesiwlerde Nókis qalası hám rayonlardan 16 komanda qatnastı. Qızǵın ótken jarıstıń final oyınında Nókis qalası komandası birinshi orındı iyelewge eristi. Tórtkúl rayonı veteranları ekinshi orın. Al, sıylı úshinshi orın Xojeli hám Beruniy rayonları komandalarına nesip etti.

Ótkerilgen jarıs sońında jeńimpazlarǵa shólkemlestiriwshiler tárepinen tayarlanǵan arnawlı diplom hám estelik sawǵalar tapsırıldı.

Sonday-aq «Eń jaqsı hújimshi» nominaciyası boyınsha Xojeli rayonınan Rozimov Orınbay, «Eń jaqsı qorǵawshı» nominaciyası boyınsha Beruniy rayonınan Tadjibaev Shavkat, «Eń jaqsı dárwazaman» nominaciyası boyınsha Nókis qalasınan Mishenov Maqset bahalı sawǵalar menen sıylıqlandı.