Mámleketimizde islep shıǵarılıp atırǵan avtomobiller ushın awısıq bóleklerdi islep shıǵarıw boyınsha jańa joybarlar kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Wzavtosanoat» akcionerlik jámiyeti basqarıwı baslıǵı U.Rwziqulov, «ADM Global» kompaniyası bas direktorı D.Davletiyarov, kompaniyanıń sırtqı baylanıslar hám mámleketlik hákimiyat uyımları menen birge islesiw basqarmasınıń direktorı S.Abbasov, «ADMC DASAN» kompaniyası bas direktorınıń orınbasarı, lokalizaciyalaw bólimi baslıǵı A.Soliev penen ushırastı.

Ótkerilgen ushırasıwda avtomobilsazlıqtı rawajlandırıw baǵdarında birge islesiw, mámleketimizde islep shıǵarılıp atırǵan avtomobiller ushın awısıq bóleklerdi islep shıǵarıwdı jolǵa qoyıw arqalı lokalizaciyalaw jumısların jedellestiriw, birgelikte joybarlardı ámelge asırıw hám basqa da áhmiyetli máseleler haqqında sóz etildi. 

Bunnan soń ámelge asırılıwı belgilengen joybarlar prezentaciyası kórip shıǵılıp, usınıslar bildirildi.

Óz náwbetinde, Joqarǵı Keńes Baslıǵı húrmetli Prezidentimizdiń Qaraqalpaqstanda isbilermenlikti rawajlandırıw hám investiciyalıq ortalıqtı ele de jaqsılaw baǵdarında óz aldına berilgen jeńillikler haqqında keń túrde atap ótip, jańa jumıs orınların jaratıwǵa qaratılǵan hár qanday joybar qollap-quwatlanatuǵınlıǵın ayttı.

Ushırasıw juwmaǵında miymanlar jıllı júzlilik penen kútip alǵanı ushın óz minnetdarshılıǵın bildirdi hám birgelikte perspektivalı joybarlardı ámelge asırıw boyınsha kelisip alındı.

Atap ótiw orınlı, búgingi kúnde KIA avtomobil islep shıǵarıw kompaniyasınıń bólimin Qaraqalpaqstanda ashıw, awısıq bólekler islep shıǵarıw máseleleri de úyrenilip atırǵan bolıp, bul boyınsha ámeliy jumıslar dawam ettirilmekte.