Qıtay kompaniyası menen qurılıs tarawında birge islesiwdi bekkemlew boyınsha áhmiyetli kelisimge qol qoyıldı

Jaqında qurılıs tarawındaǵı investiciyalıq joybarlardı dodalaw hám birge islesiwdi bekkemlew boyınsha Qaraqalpaqstan Respublikası Joqarǵı Keńesiniń komitet baslıǵı I.Sdıkov basshılıǵındaǵı respublikamız delegaciyası Qıtay Xalıq Respublikasına xızmet saparı menen bardı.

Sapar sheńberinde «METALLURGICAL CORPARATION OF CHINA LIMITED» (China MCC17 Group Ltd…) kompaniyası imaratında Qaraqalpaqstan delegaciyası hám usı kompaniya baslıǵı, Partiya xatkeri Lyu Ani menen ushırasıw ótkerildi. Onda eki tárepleme birge islesiwdi jolǵa qoyıw, qurılıs tarawında birgelikte joybarlardı ámelge asırıw, óz-ara tájiriybe almasıw hám perspektivalı joybarlar ústinde birge islesiw boyınsha sóylesiwler alıp barıldı. 

Ótkerilgen ushırasıwda eki tárepleme birge islesiwdi jolǵa qoyıw hám keńeytiw mámleketler basshılarınıń ayrıqsha qollap-quwatlawı menen jańa basqıshlarǵa kóterilip atırǵanlıǵı, respublikamızdıń investiciya hám qurılıs tarawında Qıtay kompaniyalarınıń ornı ayrıqsha ekenligi keń túrde atap ótildi.  

Sóylesiwler dawamında kompaniya baslıǵı Lyu Ani hám Qaraqalpaqstan Respublikası Qurılıs hám úy-jay kommunal xojalıǵı ministri Q.Aytbaev arasında strategiyalıq birge islesiw boyınsha shártnamaǵa qol qoyıldı.

Bunnan soń, delegaciya aǵzaları «China MCC17 Group Ltd…» kompaniyasınıń korporativ kórgizbeler zalı, sanlı basqarıw orayı, texnologiya orayı hám «Four Harmonies» kórgizbe zalında bolıp, kompaniya jumısları menen jaqınnan tanıstı.