Igor Vitalevich Savickiydiń tuwılǵanınıń 110 jıllıǵı keń túrde belgilendi

Jaqında belgili xudojnik, mádeniyat ǵayratkeri hám «Sahradaǵı Luvr» ataǵın alǵan muzey tiykarın salıwshı Igor Vitalevich Savickiydiń tuwılǵanınıń 110 jıllıǵına arnalǵan ilaj ótkerildi.  

Dáslep, Qaraqalpaqstan mádeniyatın hám kórkem ónerin dúnyaǵa tanıtıwda salmaqlı úles qosqan pidayı insan, ataqlı kollekcioner – Igor Savickiydiń qábirine zıyarat etilip, gúlsheńberler qoyıldı. 

Bunnan soń  I.V.Savickiy atındaǵı Qaraqalpaqstan mámleketlik kórkem óner muzeyi kinozalında eslew ushırasıwı bolıp ótti. 

Onda Qaraqalpaqstan Respublikası Joqarǵı Keńesiniń komitet baslıǵı M.Atamuratov shıǵıp sóylep, Savickiydiń miynetleri hám Qaraqalpaqstan  kórkem óneri hám mádeniyatın dúnyaǵa tanıtıwday mashaqatlı, sonıń menen birge maqtanıshlı miynetleri haqqında keń túrde atap ótti. 

 Bunnan soń taraw xızmetkerleri Igor Vitalevich Savickiydiń ómiri hám miynet jolı, onıń pidákerli jumısları haqqında bayanat jasadı.  

Ilaj dawamında, «Igor Savickiy dúnyası» kórgizbesi boylap ekskursiya shólkemlestirildi. Ekskurciya dawamında miymanlar onıń kollekcionerlik jolı, dóretiwshiligi hám kórkem ónerge bolǵan ayrıqsha mehirine jáne bir márte gúwa boldı.