Qaraózek rayonında xalıqtıń turmıs sharayatın jaqsılaw boyınsha ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qaraózek rayonında xalıqtıń turmıs sharayatın jaqsılaw, puqaralardıń bántligin támiyinlew hám isbilermenlikti rawajlandırıw boyınsha ámelge asırılıp atırǵan jumıslar menen jaqınnan tanıstı. 

Dáslep, Toǵay xojalıǵınıń 7 gektar jer maydanında grant qarjıları tiykarında ornatılǵan jamǵırlatıp suwǵarıw texnologiyası kózden ótkerildi. Sırtqı biyǵárez kómekler hám grant qarjıların tartıw arqalı bunday joybarlardı kóbeytiw kerek ekenligi atap ótildi. 

Bunnan soń, Joqarǵı Keńes Baslıǵı «Berdaq» APJ daǵı «Aytbay Jeri» JShJ kárxanasınıń baǵshılıq hám palız ónimlerin jetistiriw joybarı, húrmetli Prezidentimizdiń 153-sanlı qararı tiykarında jaslarǵa ajıratılǵan jer maydanlarında jetistirilgen ónimler, «Ata mákan» MPJdaǵı Xojamuratov Shamurattıń diyqan xojalıǵı, Seydabullaev Paraxattıń júzimgershilikti rawajlandırıw boyınsha jumısların barıp kórdi. Jer menen tillesip, onı dáramat deregine aylandırıw arqalı shańaraǵına qosımsha dáramat kirgizip atırǵan shańaraqlar sanın elede kóbeytiw kerek ekenligi, bunıń ushın barlıq imkaniyatlar jaratıp berilgenligi ayrıqsha tilge alındı. 

Jaslar orayı imaratında shet tillerine oqıtıw boyınsha shólkemlestirilgen jumıslar, aralıqtan xızmet kórsetiwshi BPO orayında jaslardı informaciya texnologiyalarına oqıtıw procesleri de kózden ótkerildi. 


«Esim» MPJdaǵı Jumanazarov Polattıń úy sharayatında qurılıs ónimlerin islep shıǵarıw joybarı, Dawletyar Erimbetovtıń úy sharayatında mebel islep shıǵarıw, Júginis Palwaniyazovtıń ayna ónimlerin islep shıǵarıw joybarları kórip shıǵıldı. Isbilermenlikti rawajlandırıw boyınsha barlıq járdemlerdi kórsetiw, olardı qollap-quwatlaw boyınsha juwapkerlerge anıq tapsırmalar berildi.