Elimizde futzal sportın rawajlandırıw máseleleri talqılandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ózbekstan futzal federaciyasınıń prezidenti Bekzot Mamatqulov penen ushırastı. 

Onda dáslep, húrmetli Prezidentimizdiń basshılıǵında barlıq tarawlar qatarında, sporttı rawajlandırıwǵa hám ǵalaba en jaydırıwǵa keń imkaniyatlar jaratılıp atırǵanı, ásirese, jaslarımız arasınan elimizdiń bayraǵın dúnyaǵa ele de tanıtatuǵın sportshılardı jetilistirip shıǵarıwǵa úlken itibar qaratılıp atırǵanı atap ótildi. Sonday-aq, usınday itibar nátiyjesinde komandalıq sport túrleri boyınsha joqarı nátiyjelerge erisilip, usı qatarda jaslar arasında millionlar oyını esaplanǵan futbol hám futzal oyınlarına qızıǵıwshı jaslar sanı artıp atırǵanı ayrıqsha tilge alındı. 

Bunnan soń futboldı rawajlandırıw menen birge futzal sportın da keńnen ǵalabalastırıw, jaslardı bul sport túrine ele de keńnen tartıw, sonday-aq, Ózbekstan futzal federaciyasınıń Qaraqalpaqstan Respublikası aymaqlıq bólimin shólkemlestiriw sıyaqlı áhmiyetli máseleler sóz etildi. 



Ushırasıw dawamında Prezidentimiz tárepinen jaratıp berilgen imkaniyatlardan paydalanıp, futzaldı ele de ǵalabalastırıw boyınsha ilajlardı kúsheytiw hám basqa da áhmiyetli baǵdarlar boyınsha kelisip alındı.