Qaraqalpaqstan Respublikasında «Jańa Ózbekstan Olimpiya shıńları» sport jarıslarınıń 2-basqıshına start berildi

Nókis Olimpiya hám paralimpiya sport túrlerine tayarlaw orayında «Jańa Ózbekstan Olimpiya shıńları» sport jarısları 2-basqıshı bellesiwleriniń ashılıw saltanatı ótkerildi.

Onda Qaraqalpaqstan Respublikası Joqarǵı Keńesiniń komitet baslıǵı M.Atamuratov hám Sport ministri E.Qutıbaevlar shıǵıp sóylep, sportshılarǵa áwmet tiledi.

«Jańa Ózbekstan Olimpiya shıńları» sheńberinde dáslep sporttıń taekvondo WT túrinen bellesiwler ótkerildi. Onda Respublikamızdıń barlıq qala hám rayonlarınan kelgen jas sportshılar qatnastı.

Qızǵın bellesiwerge bay túrde ótkerilgen jarıs juwmaǵında jeńimpazlar diplom, medallar hám bahalı sawǵalar menen sıylıqlandı.

Atap ótiw orınlı, bul basqıshta tabıslı qatnasıp, juwmaǵında óz salmaq kategoriyalarında jeńimpaz bolǵan qatnasıwshılar úshinshi basqısh - Prezident olimpiadasında qatnasıw imkaniyatın qolǵa kirgizedi.