«Jańa Ózbekstan Olimpiya shıńları» sport jarıslarınıń 2-basqıshına start berildi

 «Jańa Ózbekstan Olimpiya shıńları» sport jarıslarınıń 2-basqıshınıń ashılıw saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jarıstıń ashılıwı múnásibeti menen jıynalǵanlardı qutlıqladı hám sportshılarǵa áwmet tiledi.


Atap ótiw orınlı, 5-28-avgust kúnleri aralıǵında «Jańa Ózbekstan Olimpiya shıńları» sport jarıslarınıń 2-basqıshı sheńberinde jámi 10 sport túri boyınsha jeńimpazlar anıqlanıwı belgilengen. Bul basqıshta tabıslı qatnasıp, juwmaǵında óz salmaq kategoriyalarında jeńimpaz bolǵan qatnasıwshılar úshinshi basqısh - Prezident olimpiadasında qatnasıw imkaniyatın qolǵa kirgizedi.

Bunnan soń kún dawamında ótkeriliwi belgilengen bellesiwler baslap jiberildi. Onda Respublikamızdıń barlıq qala hám rayonlarınan kelgen jas sportshılar qatnastı.

Qızǵın qarama-qarsılıqlarǵa bay túrde bolıp ótetuǵın jarıs juwmaǵında jeńimpazlar diplom, medallar hám bahalı sawǵalar menen sıylıqlanadı.