Joqarǵı Keńes Baslıǵı Taxtakópir rayonında xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanıstı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taxtakópir rayonında xalıqtıń bántligin támiyinlew, puqaralardıń turmıs abadanlıǵın arttırıw, isbilermenlikti qollap-quwatlaw baǵdarında ámelge asırılıp atırǵan jumıslardı úyrendi.
Dáslep, “Qaraoy” máhállesinde jumıssız jaslarǵa ajıratılǵan jer maydanlarında shɵlkemlestirilgen “bir kontur bir ɵnim” joybarı sonday-aq, usı máhálle aymaǵında 10 jastıń bántligi támiyinlengen ıssıxana jumısı barıp kórildi. Sonday-aq, «Ózbekstan» máhállesi aymaǵındaǵı Jabbarbergenov Esemurattıń qıytaq jerinde shólkemlestirilgen jumıslar kózden ótkerildi. Egislik maydanlarınan nátiyjeli paydalanıwdı shólkemlestiriw arqalı joqarı dáramat alıwdı jolǵa qoyıw áhmiyetli ekenligi atap ótildi. 
Bunnan soń Joqarǵı Keńes Baslıǵı «A.Adilov» APJ aymaǵında «KAUSAR TEGIRMON» JShJ tárepinen 878,0 mıń AQSh dolları muǵdarında qarjılar tiykarında iske túsirilgen «Júndi qayta islew» joybarı, «Taxtakopir» máhállesindegi kishi sanaat zonasında ámelge asırılıp atırǵan jumıslar, «Taxtakopir Nan O’nimleri» JShJ tarepinen dán ɵnimlerin sortlaw (kolibirovka) joybarı menen jaqınnan tanıstı. Isbilermenlikti rawajlandırıw baǵdarında olar ushın barlıq qolaylı sharayatlardı jaratıw, jaqınnan járdem beriw boyınsha juwapkerlerge anıq tapsırmalar berildi.
Hayal-qızlardıń bántligin támiyinlew baǵdarında “Taxtakópir sheber qollar” tigiwshilik kárxanasında shólkemlestirilgen jumıslar barıp kórilip, isbilermenniń óz jumısın keńeytiwinde ushırasıp atırǵan mashqalaları tıńlandı.
Rayon orayında jańadan qurılıp atırǵan kóp qabatlı turaq jaydıń qurılısı barısı da úyrenildi. Qurılıs jumısların óz waqtında hám sapalı etip pitkeriw boyınsha tapsırmalar berildi.
Aralıqtan xızmet kórsetiwshi BPO orayı hám rayonlıq medicina birlespesindegi sanlastırıw jumısları kózden ótkerildi.
Joqarǵı Keńes Baslıǵı bunnan soń aldaǵı ámelge asırılıwı tiyis jumıslar hám sheshimin kútip turǵan máselelerdi belgilep alıw boyınsha kóshe biyleri hám nuranıylar menen ushırastı.
