Taxtakopir rayonın hár tárepleme rawajlandırıw máseleleri kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında Taxtakópir rayonın sociallıq-ekonomikalıq jaqtan rawajlandırıw, xalıqtıń bántligin támiyinlew, mámleketlik baǵdarlamalar sheńberindegi belgilengen wazıypalar, ámelge asırılıwı tiyis ilajlardıń hám aldınǵı májiliste berilgen tapsırmalardıń orınlanıwına arnalǵan májilis ótkerildi. 

Onda respublikalıq mákeme, shólkem hám tiyisli ministrlikler, rayon juwapkerleri, máhálle belsendileri qatnastı. 

Májiliste dáslep, belgilep berilgen tapsırmalardıń búgingi kúnde orınlanıwı, máhállelerdi abat etiw, infrastruktura menen baylanıslı mashqalalardı sheshiw, mámleketlik baǵdarlamalar sheńberinde joybarlardıń ámelge asırılıwı, jańa kárxanalar jumısların shólkemlestiriw, kóp qabatlı úylerdi qurıw, qayta tikleniwshi energiya dereklerin keńnen en jaydırıw, kámbaǵallıqtı qısqartıw, puqaralardıń turmıs dárejesin jaqsılaw barısında wazıypalardıń orınlanıwı máseleleri sın kóz-qarasta kórip shıǵıldı. 

Sonıń menen birge, puqaralardıń qosımsha dáramat alıwına kómeklesiw, qıytaq jerlerden nátiyjeli paydalanıwdı en jaydırıw, jaslardıń bántligin támiyinlew, isbilermenlikti rawajlandırıw, kárxanalar jumıslarına jaqınnan járdem beriw, bank xızmetlerin hám bazar infrastrukturasın jaqsılaw boyınsha da tapsırmalardıń orınlanıwı máseleleri de talqılandı.



Onda sonday-aq, bul jumıslardı ámelge asırıwda ayırım juwapkerlerdiń óz wazıypasına nemquraylıq penen qarap atırǵanı sınǵa alınıp, kemshilikler atap ótildi. Sonıń menen birge, óz wazıypasın atqarıwda qáte-kemshiliklerge jol qoyǵan ayırım juwapkerler lawazımınan azat etildi. Bir topar basshı hám juwapkerlerge intizamiy jaza-sharasın qollaw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.