Joqarǵı Keńes Baslıǵı Qońırat rayonında boldı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev puqaralardıń turmısında ushırasıp atırǵan mashqalalardı úyreniw, isbilermenlerdiń máselelerin tıńlaw, jaslardı kásipke baǵdarlaw jumısların úyreniw maqsetinde Qońırat rayonında boldı.
Dáslep, Joqarǵı Keńes Baslıǵı «Suwenli» APJdaǵı «Saǵır» awılında ishimlik suwı menen támiyinlew mashqalası boyınsha awıl turǵınları menen ushırastı. Onda awıl xalqın taza ishimlik suwı menen támiyinlew maqsetinde suw tazalaw obektin qurıw ushın tiyisli qarjılardı ajıratıw boyınsha juwapkerlerge tapsırmalar berildi.
Bunnan soń, «Almazar» MPJdaǵı sociallıq úydegi mashqalalardı sheshiw boyınsha aldınǵı berilgen tapsırmalardıń orınlanıwı kórip shıǵıldı. Berilgen tapsırmalarǵa tiykar búgingi kúnde kóp qabatlı imarattı aqaba suw tarmaqlarında ońlaw jumısları alıp barılıp, energiya tarmaqları ushın arnawlı esaplaǵıshlar ornatıp berilgen.
«Ádebiyat» APJ aymaǵındaǵı Tirkish hám Sayat awılların baylanıstırıwshı avariyalıq jaǵdaydaǵı kópir barıp kórildi. awıl aqsaqalları menen pikirlesilip, juwapkerlerge mashqalalanı sheshiw ushın ajıratılıwı tiyis qarjılardıń esap-sanaǵın islep shıǵıw boyınsha tapsırmalar berildi.
«Beruniy-Agrostar» JShJ tárepinen sharwa ushın azıqlıq jetistiriw boyınsha agroplantaciya jaratıw joybarı, «KUNGRAD LESTORG» JShJniń aǵash ónimlerin islep shıǵarıw joybarı hám jańadan shólkemlestirilgen logistika orayı jumısları kózden ótkerildi.
Bunnan soń, «Kiyet diyqanları» islep shıǵarıw kooperativi tárepinen «bir kontur – bir ónim» ólshemi tiykarında shólkemlestirilgen jumıslar, «Kásiplik kónlikpeler orayı»nıń rayondaǵı filialında shólkemlestirilgen til úyretiw kursları, aralıqtan xızmet kórsetiwshi BPO orayı jumısları kórip shıǵıldı.
