Bir topar belsendi isbilermenler sıylıqlandı

Búgin Qaraqalpaqstan Respublikası Joqarǵı Keńesinde Isbilermenler kúni múnásibeti menen bir topar belsendi isbilermenlerdi sıylıqlaw máresimi bolıp ótti. 

Onda Qaraqalpaqstan Respublikası Ministrler Keńesiniń Baslıǵı F.Ermanov shıǵıp sóylep, húrmetli Prezidentimiz tárepinen búgingi kúnde oǵada áhmiyetli bolǵan, isbilermenlik jumısın keńeytiw hám jańa joybarlardı ámelge asırıw ushın qolaylı sharayatlar jaratıw, isbilermenlikti rawajlandırıwǵa tosqınlıq etip atırǵan mashqalalardı saplastırıw boyınsha turmısqa engizilip atırǵan baslamalar, qabıl etilip atırǵan párman hám qararlar haqqında keń túrde atap ótti.  

Ilajda atap ótilgenindey, sońǵı jıllarda Qaraqalpaqstan ushın óz aldına qabıl etilgen qarar hám pármanlar regionda isbiermenlikti rawajlandırıw, investiciyalıq tartımlıqtı arttırıw hám ekonomikalıq ósimdi támiyinlewde bekkem tiykar bolıp xızmet etpekte. Qısqa waqıt ishinde jańadan-jańa obekter iske túsirilip, iri kólemdegi investiciyalıq joybarlar ámelge asırılmaqta.

Ótkerilgen ilajda mine usınday iygilikli jumıslar keń túrde atap ótildi. 

Bayram ilajında húrmetli Prezidentimizdiń arnawlı Pármanları tiykarında sıylıqlanǵan Kegeyli rayonındaǵı "Arzıw" kóp tarmaqlı fermer xojalıǵınıń baslıǵı Salieva Palzadaǵa «Dwstlik» ordeni, Tórtkúl rayonındaǵı "115-Tórtkúl avtokárxanası" juwapkershiligi sheklengen jámiyetiniń shólkemlestiriwshisi Kerimbaev Ǵayratdin hám Nókis qalasındaǵı "Good Cafe" shańaraqlıq kárxanasınıń basshısı Mamutova Maxiraǵa «Shuhrat» medalı, sonday-aq, 6 belsendi isbilermenlerimizge “Faol tadbirkor” kókirek belgisi saltanatlı túrde tapsırıldı. 

Bunnan tısqarı, Joqarǵı Keńes Prezidiumı qararı menen bir qatar isbilermenler Joqarǵı Keńestiń kókirek belgileri, Húrmet jarlıqları hám bahalı sawǵalar menen sıylıqlandı.