Yaponiya tájiriybesi Qaraqalpaqstanda: Nókiste " U-HOPE-2025" baǵdarlaması iske tústi
Qaraqalpaqstanda isbilermenlikti rawajlandırıwda jańa bet ashıldı. Nókis qalasında «Biznesti rawajlandırıw banki» tárepinen «Yori-I» joybarı sheńberindegi
«U-HOPE-2025» xalıqaralıq innovaciyalıq baǵdarlamasınıń ashılıw máresimi shólkemlestirildi. Bul baǵdarlama Yaponiyanıń aldınǵı tájiriybelerin jergilikli isbilermenlik ortalıǵına engiziwge qaratılǵan.
Ózbekstan Prezidentiniń kishi biznesti qollap-quwatlaw baǵdarındaǵı baslamaları, atap aytqanda, yapon modeli tiykarında isbilermenlerdi oqıtıw hám Qaraqalpaqstanda
50 mentordı tayarlaw zárúrligi «U-HOPE-2025 START» joybarınıń tiykarın quraydı. Bul joybar Biznesti rawajlandırıw banki tárepinen Yamagata universitetiniń birge islesiwinde ámelge asırılmaqta.
Yaponiya nou-xaularına tiykarlanǵan halda tayarlanatuǵın 50 mentor óz bilimlerin basqalarǵa jetkerip, aymaqta isbilermenlik jumısın janlandırıwǵa, jańa jumıs orınların jaratıwǵa hám xalıqtıń turmıs dárejesin
arttırıwǵa úles qosadı. Bul joybar arqalı Qaraqalpaqstan ekonomikasına yaponsha anıqlıq hám innovaciyalıq kózqaras kirip keliwi kútilmekte.