112 jaslı Norjon mamaǵa «Shuhrat» medalı tapsırıldı

«Ózbekstan Respublikası ǵárezsizliginiń otız tórt jıllıǵı múnásibeti menen mámleketlik xızmetkerler jáne islep shıǵarıw hám sociallıq-ekonomikalıq tarawlardıń xızmetkerlerinen bir toparın sıylıqlaw haqqında»ǵı
Prezident Pármanında Beruniy rayonında jasap atırǵan Norjon ana Zaripova da orın alǵan edi. 

«Shuhrat» medalına múnásip dep tabılǵan N.Zaripovaǵa Prezidentimizdiń joqarı sıylıǵın Qaraqalpaqstan Respublikası Ministrler Keńesiniń Baslıǵı F.Ermanov tapsırdı hám bayram múnásibeti menen qutlıqladı.

Ómirin atızda ápiwayı jumısshı bolıp islep ótkergen N.Zaripova paxtashılıq hám ǵálleshilik tarawında úlken tájiriybe arttırıp, mol paxta hám ǵálle jetistiriw baǵdarında jemisli miynet etken. 

1913-jılı tuwılǵan 112 jasar ana pútkil ómiri dawamında awıl xojalıǵın rawajlandırıw jolında xızmet etken bolsa, búgingi kúnde Watanımızǵa tınıshlıq, el-jurtımızǵa amanlıq, jaslarımızǵa kúsh-ǵayrat tilep kelmekte. Norjon mama búgingi kúnde tárbiyalap kamalǵa keltirgen 9 perzenti, 30 aqlıǵı, 60 shawlıǵı, 11 quwlıǵı qushaǵında hámmeni awızbirshilikke shaqırıp jasap kelmekte.