Ózbekstan Respublikası ǵárezsizliginiń otız tórt jıllıǵı keń túrde belgilendi
Paytaxtımız Nókis qalasındaǵı oraylıq Amfiteatrda elimiz ǵárezsizliginiń otız tórt jıllıǵına baǵıshlanǵan «Watan ushın, millet ushın, xalıq ushın!» degen ideya astında bayram saltanatı bolıp ótti.
Saltanatlı ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, gúllán xalqımızdı eń ullı, eń muqaddes áyyyam – elimiz ǵárezsizliginiń otız tórt jıllıǵı bayramı menen qızǵın qutlıqladı.
Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov, Qaraqalpaqstan Respublikası Joqarǵı Keńesiniń deputatları, húkimet aǵzaları, ministrlik hám shólkemler, keń jámiyetshilik wákilleri, ǵalaba xabar quralları xızmetkerleri qatnastı.
Atap ótilgenindey, sońǵı jıllarda hurmetli Prezidentimizdiń basshılıǵında barlıq aymaqlar qatarında Qaraqalpaqstanda da keń kólemli reformalar ámelge asırılıp, elimizdi sociallıq-ekonomikalıq jaqtan rawajlandırıwǵa ayrıqsha itibar qaratılmaqta. Bul baǵdarda Prezidentimiz tarepinen Qaraqalpaqstan ushın óz aldına qabıl etilgen bir qatar áhmiyetli párman hám qararlar xalqımızǵa múnásip turmıs sharayatın jaratıwǵa bekkem tiykar bolıp xızmet etpekte.
Sonıń menen birge, elimizde kishi biznes hám isbilermenlik, sanaat, xızmet kórsetiw hám awıl xojalıǵı sıyaqlı tarawlarda bir qatar investiciyalıq joybarlar ámelge asırıldı. Bunıń nátiyjesinde xalqımız ushın jańa jumıs orınları jaratılıp, bir qatar iri óndiris kárxanaları, kóplegen sociallıq obektler iske túsirildi.
Usı jıldıń ózinde barlıq tarawlarda da joqarı nátiyjelerge erisilip, xalqımızdıń abadan turmısın támiyinlew boyınsha ilajlar keń túrde dawam ettirilmekte.
Bayram saltanatında Ózbekstan hám Qaraqalpaqstan Respublikaları mámleketlik gimnleri atqarıldı.
Saltanatlı bayram ilajı koncert baǵdarlaması menen dawam etti. Baǵdarlamadan orın alǵan kórkem óner sheberleri hám jas talant iyeleri atqarıwındaǵı Watan, doslıq, tınıshlıq hám tatıwlıq, jaslıq haqkındaǵı qosıqlar hám ayaq oyınlar jıynalǵanlarǵa kóterińki keypiyat baǵıshladı.