Ellikqala rayonında jańa mektep paydalanıwǵa tapsırıldı

Húrmetli Prezidentimizdiń «Islam rawajlanıw banki hám OPEK xalıqaralıq rawajlanıw fondı qatnasıwında «Awıllıq jerlerdi turaqlı rawajlandırıw» joybarın ámelge asırıw ilajları haqqında»ǵı qararına tiykar, elimizde keń kólemli jumıslar ámelge asırılmaqta.

Atap aytqanda, Ellikqala rayonı «CHwpon» máhállesinde 74-sanlı ulıwma bilim beriw mektebiniń ulıwma bahası 8,2 mlrd. sum bolǵan jańadan qurılǵan 220 orınlıq imaratı paydalanıwǵa tapsırıldı.

Ulıwma bilim beriw mektebi oqıwshıları ushın zamanagóy hám qolaylı sharayatlardı jaratıw maqset etilgen bul joybar - keleshek áwladtıń tárbiyasına qaratılǵan itibardıń úlgisi bolıp esaplanadı. Al, mámleketimiz ǵárezsizligi keń túrde belgilenip atırǵan waqıtta mekteptiń paydalanıwǵa tapsırılıwı bolsa, rayon xalqı ushın shın mánisinde bayram sawǵası boldı.